कर्तव्यात कसूर केल्याप्रकरणी पोलीस अधीक्षकांची कारवाई
जळगाव (प्रतिनिधी):- पोलीस अधीक्षक कार्यालयातील शिस्त आणि सुरक्षिततेच्या बाबतीत कोणतीही तडजोड केली जाणार नसून कर्तव्यात कसूर केल्याप्रकरणी पोलीस अधीक्षक यांनी दोन पोलीस अंमलदारांना तात्काळ निलंबित केले आहे.
पोलीस अधीक्षकांच्या बंगल्यावरील ‘गार्ड ड्युटी’ सोडून गैरहजर राहणे आणि सरकारी शस्त्रे असुरक्षित स्थितीत ठेवल्याचा ठपका या कर्मचाऱ्यांवर ठेवण्यात आला आहे.
दिनांक ८ मे २०२६ रोजी रात्री ९:२० वाजेच्या सुमारास राखीव पोलीस निरीक्षक यांनी पोलीस अधीक्षक बंगल्यावरील गार्ड ड्युटीची अचानक तपासणी केली. या तपासणीत धक्कादायक बाबी समोर आल्या.गार्ड ड्युटीवर तैनात असलेले सफौ/१३७८ संभाजी निबाजी पाटील आणि पोना/३९३ प्रदिप भगतसिंग राजपूत हे दोघेही आपल्या कर्तव्यस्थळी गैरहजर होते.सर्वात गंभीर बाब म्हणजे गार्ड रूममध्ये ३ एस.एल.आर. रायफल (बट नं. ८२, २६२, ८८२) या कोणत्याही सुरक्षिततेशिवाय आणि बेवारस अवस्थेत आढळून आल्या. संवेदनशील ठिकाणी अशा प्रकारे शस्त्रे सोडून जाणे ही सुरक्षेच्या दृष्टीने मोठी चूक मानली गेली आहे.
संवेदनशील ठिकाणी कर्तव्यावर असताना अशा प्रकारचा निष्काळजीपणा करणे हे ‘महाराष्ट्र नागरी सेवा (वर्तवणूक) नियम १९७९’ च्या नियम ३ चे उल्लंघन आहे. या गंभीर प्रकाराची दखल घेत पोलीस अधीक्षकांनी दोन्ही अंमलदारांना शासकीय सेवेतून निलंबित करण्याचे आदेश दिले आहेत. सदर ही कारवाई पोलीस अधीक्षक श्रीकांत धिवरे यांनी केली आहे.
