अग्निशमन दलाचे शर्थीचे प्रयत्न सुरू; मोठे आर्थिक नुकसान
जळगाव (प्रतिनिधी) :- शहरातील एमआयडीसी परिसरात एका चटई बनविणाऱ्या कंपनीला लागलेल्या भीषण आगीने आज खळबळ उडाली. आगीने काही क्षणांतच रौद्ररूप धारण करत संपूर्ण परिसर धुराने व्यापला. विशेष म्हणजे कंपनीतील गॅस सिलिंडरचे एकामागून एक स्फोट झाल्याने परिसर हादरून गेला असून नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, एमआयडीसीतील ‘जे’ सेक्टरमध्ये असलेल्या संबंधित कंपनीत अचानक आग लागली. कंपनीत साठवलेल्या ज्वालाग्राही साहित्यामुळे आगीने वेगाने फैलाव घेतला. आगीची तीव्रता इतकी होती की, कंपनीतील तब्बल चार गॅस सिलिंडरचे स्फोट झाले. स्फोटांच्या आवाजामुळे आसपासच्या नागरिकांमध्ये घबराट पसरली.
दरम्यान, ही आग शेजारील ठिबक सिंचन साहित्य तयार करणाऱ्या कंपनीपर्यंत पोहोचल्याने परिस्थिती अधिक गंभीर बनली. आगीची झळ बसत असतानाही काही कामगारांनी धाडस दाखवत कंपनीतील साहित्य सुरक्षित ठिकाणी हलविण्याचा प्रयत्न केला.
घटनेची माहिती मिळताच अग्निशमन दलाचे दोन बंब घटनास्थळी दाखल झाले. मात्र, आगीचा व्याप मोठा असल्याने हे बंब अपुरे पडत असल्याचे दिसून आले. गाड्यांमधील पाणी संपताच आगीने पुन्हा उग्र रूप धारण केल्याने परिस्थिती नियंत्रणाबाहेर जाण्याची भीती व्यक्त होत आहे. त्यामुळे महापालिका व इतर ठिकाणांहून अतिरिक्त मदत मागविण्यात आली आहे.
आगीचे नेमके कारण अद्याप स्पष्ट झाले नसून शॉर्ट सर्किटमुळे आग लागली असावी, असा प्राथमिक अंदाज व्यक्त केला जात आहे. अधिकृत तपासानंतरच खरी कारणमीमांसा समोर येणार आहे. सुदैवाने या घटनेत कोणतीही जीवितहानी झाल्याचे वृत्त नाही; मात्र मोठ्या प्रमाणावर आर्थिक नुकसान झाल्याची प्राथमिक माहिती समोर आली आहे.
