जळगाव एलसीबीची धडक कारवाई
जळगाव (प्रतिनिधी):-जिल्ह्यातील गॅस एजन्सींची गोदामे फोडून गॅस सिलेंडरची चोरी करणाऱ्या एका अट्टल गुन्हेगारांच्या टोळीला स्थानिक गुन्हे शाखेने अटक केली आहे. पोलिसांनी या कारवाईत तीन आरोपींना ताब्यात घेतले असून त्यांच्याकडून ४ लाख २७ हजार ५०० रुपये किमतीचा मुद्देमाल जप्त केला आहे.
फैजपूर आणि वरणगाव पोलीस ठाण्याच्या हद्दीत गॅस सिलेंडर चोरीच्या घटना घडल्या होत्या. या गुन्ह्यांचे गांभीर्य ओळखून पोलीस अधीक्षक श्रीकांत धिवरे यांनी स्थानिक गुन्हे शाखेला तपासाचे आदेश दिले होते. तपासादरम्यान घटनास्थळावरील तांत्रिक माहिती आणि गोपनीय बातमीदारांकडून मिळालेल्या माहितीच्या आधारे पोलिसांनी संशयास्पद वाहनांचा मागोवा घेतला. या तपासाअंती पोलिसांनी तीन आरोपींना अटक केली. शेख बिलाल शेख नबी (वय ३२, रा. कासोदा, ता. एरंडोल), वसीम खान शाबीर खान (वय ३१, रा. तांबापुरा, जळगाव), चेतन सुरेश काळे (वय ३८, रा. नशिराबाद, ता. भुसावळ) असे त्यांचे नाव आहे.
चौकशीदरम्यान आरोपींनी त्यांच्या इतर साथीदारांच्या मदतीने फैजपूर येथील ‘श्रीधर गॅस एजन्सी’ आणि वरणगाव येथील ‘भारत गॅस’ च्या गोदामातून चोरी केल्याची कबुली दिली आहे. एकूण मुद्देमाल: ४,२७,५०० रुपये जप्त केला आहे.
ही कामगिरी पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत यांच्या मार्गदर्शनाखाली वरिष्ठ पोलीस निरीक्षक राहुल गायकवाड, पोलीस उपनिरीक्षक सोपान गोरे आणि त्यांच्या पथकाने फत्ते केली. पुढील तपास पोलीस उपनिरीक्षक मैनुद्दीन सैय्यद व विनोद गाभणे करीत आहेत.
