पाचोऱ्याच्या कुऱ्हाड तांड्यावर घटना
पाचोरा (प्रतिनिधी):- तालुक्यातील कुऱ्हाड तांडा येथे जुन्या वादाचे पर्यावसान हाणामारीत होऊन एका तरुणावर धारदार चाकूने प्राणघातक हल्ला करण्यात आला. ही घटना २४ एप्रिल रोजी रात्री १० ते १०:३० वाजेच्या सुमारास फिर्यादीच्या घराबाहेर घडली. या हल्ल्यात हिनेश इंद्रजित तंवर हा तरुण गंभीर जखमी झाला आहे.
फिर्यादी सुमित रूपचंद तंवर (वय २०, रा. कुऱ्हाड तांडा) यांनी दिलेल्या फिर्यादीनुसार, २४ एप्रिल रोजी रात्री आरोपींनी जुन्या वादाचा राग धरून सुमित आणि त्यांचा चुलत भाऊ हिनेश तंवर यांना गाठले. आरोपींनी त्यांना लाथाबुक्क्यांनी मारहाण करत शिवीगाळ केली व “तुम्हाला जिवंत सोडणार नाही” अशी धमकी दिली. या दरम्यान, आरोपी आकाश शांताराम ठाकरे याने हिनेश तंवर याला जिवे मारण्याच्या उद्देशाने त्याच्या छातीवर आणि पोटावर धारदार चाकूने वार केले. या हल्ल्यात हिनेश गंभीर जखमी झाला असून सुमित याच्याही हाताला व मानेला दुखापत झाली आहे.
पिंपळगाव हरेश्वर पोलिसांनी या प्रकरणी सात जणांविरुद्ध गुन्हा दाखल केला आहे. रणबीर उर्फ मनी सुरेश चव्हाण (रा. नाईक नगर, पाचोरा), सुमित अंकुश राठोड (रा. कुऱ्हाड तांडा), आकाश शांताराम ठाकरे (रा. कुऱ्हाड तांडा), दीपक मांगीलाल राठोड (रा. कुऱ्हाड तांडा), आकाश राजू राठोड (रा. कुऱ्हाड तांडा) – (अटक), गोपाल ठाकरे (रा. कुऱ्हाड तांडा), एक अनोळखी मुलगा (पांढरा शर्ट घातलेला) अशी त्यांची माहिती आहे.
घटनेची माहिती मिळताच पाचोरा विभागाचे उपविभागीय पोलीस अधिकारी आणि पिंपळगाव हरेश्वर पोलीस ठाण्याच्या प्रभारी अधिकारी सपोनि कल्याणी वर्मा यांनी घटनास्थळी भेट दिली. या प्रकरणातील आरोपी क्रमांक ५, आकाश राजू राठोड याला पोलिसांनी अटक केली आहे. पुढील तपास पोलीस उपनिरीक्षक विठ्ठल पवार करत आहेत.
