जळगावात शिव कॉलनी येथे सोन्या-चांदीच्या दागिन्यांची चोरी
जळगाव (प्रतिनिधी):- शहरांतील शिव कॉलनी परिसरात एका महिलेच्या घरातून सोन्या-चांदीचे दागिने चोरून नेल्याची धक्कादायक घटना उघडकीस आली आहे. विशेष म्हणजे, फिर्यादी महिलेची लाखो रुपयांची फसवणूक करणाऱ्या संशयित आरोपीच्या पत्नीनेच ही चोरी केल्याचा आरोप असून, याप्रकरणी रामानंद नगर पोलीस ठाण्यात गुन्हा दाखल करण्यात आला आहे.
शिव कॉलनीतील रहिवासी दीपिका संदीप पाटील (वय ३९) यांनी दिलेल्या तक्रारीनुसार, सन २०२२ मध्ये त्यांच्या एका नातेवाईकाने (हर्षल संजय वाघ, रा. लोहगाव, ता. शिंदखेडा) नाशिक येथील नोट प्रेसमध्ये नोकरी लावून देण्याचे आमिष दाखवले होते. या बदल्यात त्याने पाटील यांच्याकडून १४ लाख रुपये घेतले होते. मात्र, दोन वर्षे उलटूनही नोकरी न लावल्याने पाटील यांनी पैशांचा तगादा लावला होता.
तडजोडीसाठी घरी आली आणि दागिने लंपास केले
या पैशांच्या वादात तडजोड करण्यासाठी ४ एप्रिल रोजी संशयित हर्षल वाघ याची पत्नी अश्विनी वाघ ही जळगाव येथे फिर्यादीच्या घरी आली होती. ६ एप्रिल रोजी दुपारी ४ ते ५:३० च्या सुमारास फिर्यादी दीपिका पाटील या थेरपीसाठी घराबाहेर गेल्या होत्या. यावेळी अश्विनी वाघ ही घरातच होती. फिर्यादी घरी परतल्या असता, अश्विनी कोणालाही काहीही न सांगता घरातून निघून गेल्याचे दिसून आले. संशय आल्याने फिर्यादीने घरातील हॉलमध्ये तपासून पाहिले असता, कपाटावर ठेवलेले सोन्या-चांदीचे दागिने गायब असल्याचे त्यांच्या निदर्शनास आले.
९७ हजारांचा मुद्देमाल लंपास
दागिन्यांची एकूण किंमत ९७,००० रुपये आहे, ते अश्विनी वाघ हिने चोरून नेल्याची तक्रार पाटील यांनी दिली आहे. या प्रकरणी पोलिसांनी अश्विनी हर्षल वाघ विरुद्ध गुन्हा दाखल केला असून पुढील तपास पोलीस उपनिरीक्षक स्तरावर केला जात आहे.
