पाचोरा तालुक्यातील शिंदाड येथील घटना
पाचोरा (प्रतिनिधी):- दारूच्या नशेत पत्नीला शिवीगाळ करणाऱ्या चुलत भावाला समजावण्यास गेलेल्या तरुणावर लोखंडी आसारीने हल्ला करून जखमी केल्याची घटना पाचोरा तालुक्यातील शिंदाड येथे घडली. याप्रकरणी पिंपळगाव हरेश्वर पोलीस ठाण्यात एकाविरुद्ध गुन्हा दाखल करण्यात आला आहे.
फिर्यादी अनिल भिका साळुंखे (वय ३२, रा. शिंदाड, ता. पाचोरा) हे आपल्या कुटुंबासह वास्तव्यास असून त्यांचे सलूनचे दुकान आहे. सोमवार, ६ एप्रिल रोजी सायंकाळी ४:१५ वाजेच्या सुमारास अनिल साळुंखे यांचा चुलत भाऊ सूरज अशोक साळुंखे हा दारूच्या नशेत अनिल यांच्या पत्नीला विनाकारण शिवीगाळ करत होता.
अनिल साळुंखे हे सूरजला समजावण्यासाठी गेले आणि “तू शिवीगाळ का करतोस?” असे विचारले. याचा राग आल्याने आरोपी सूरज साळुंखे याने जवळ असलेल्या लोखंडी आसारीने अनिल यांच्या डोक्यात वार केला. या हल्ल्यात अनिल साळुंखे हे जखमी झाले आहेत.
मारहाण केल्यानंतर आरोपीने फिर्यादी व त्यांच्या पत्नीला “मी फाशी घेऊन मरून जाईल आणि तुम्हा दोघांना त्यात फसवून टाकीन,” अशी धमकीही दिली. या घटनेनंतर अनिल साळुंखे यांनी पिंपळगाव हरेश्वर पोलीस ठाण्यात धाव घेऊन तक्रार दिली.
याप्रकरणी पिंपळगाव हरेश्वर पोलीस ठाण्यात आरोपी सूरज अशोक साळुंखे याच्याविरुद्ध गुन्हा दाखल करण्यात आला आहे. पिंपळगाव हरेश्वर पोलीस ठाण्याचा तात्पुरता पदभार असलेल्या सपोनि कल्याणी वर्मा यांच्या मार्गदर्शनाखाली पोलीस हेकॉ अतुल पवार या गुन्ह्याचा पुढील तपास करत आहेत. आरोपीला अद्याप अटक करण्यात आलेली नाही
