अमळनेरमध्ये अमलेश्वर नगरप्रकरणी मित्रावर खुनाचा गुन्हा दाखल; पहाटेच अटक
अमळनेर (प्रतिनिधी):- शहरातील अमलेश्वर नगर भागात घडलेल्या गोळीबार प्रकरणात एका तरुणाचा मृत्यू झाला असून, याप्रकरणी पोलिसांनी मयताच्या मित्राविरुद्ध खुनाचा गुन्हा दाखल केला आहे. भूषण देविदास महाजन असे अटक करण्यात आलेल्या आरोपीचे नाव आहे.
अरुण सुरेश महाजन (वय ३२) हा तरुण २७ तारखेला रात्री सव्वा नऊ वाजेच्या सुमारास पत्नीला दवाखान्यात सोडून मित्र भूषण महाजन याच्या घरी गेला होता. काही वेळानंतर अरुणचा भाऊ नरेंद्र याला भूषणचा फोन आला की, “तुझा भाऊ चक्कर येऊन पडला आहे.” मात्र, नरेंद्र जेव्हा भूषणच्या घरी पोहोचला, तेव्हा तिथे मोठी गर्दी जमली होती. जमलेल्या लोकांनी सांगितले की भूषणनेच अरुणवर गोळी झाडून त्याला ठार केले आहे.
घटनेची माहिती मिळताच डीवायएसपी विनायक कोते, पोलीस निरीक्षक दत्तात्रय निकम आणि इतर पोलीस अधिकारी फौजफाट्यासह घटनास्थळी दाखल झाले. फॉरेन्सिक पथकानेही घटनास्थळाची पाहणी करून काही नमुने गोळा केले आहेत. मयताचा भाऊ नरेंद्र महाजन याच्या फिर्यादीवरून अमळनेर पोलीस स्टेशनमध्ये खुनाचा गुन्हा दाखल करण्यात आला आहे.
पोलिसांनी संशयित आरोपी भूषण महाजन याला पहाटेच अटक केली आहे. हा गोळीबार नेमका कशामुळे झाला? याचा सखोल तपास पोलीस उपनिरीक्षक शरद काकळीज करत आहेत. अरुण महाजन यांचा शहरात कुबेर मंडप नावाने व्यवसाय होता त्यांच्या मातोश्री आशा सुरेश महाजन यांनी शिवसेना शिंदे गटाकडून नुकतीच नगर परिषदेची निवडणूक लढवली होती रुग्णालयाबाहेर नागरिकांनी मोठी गर्दी केली होती अरूण महाजन यांच्या पश्चात आई, वडील, पत्नी, एक मुलगा, दोन मुली व लहान भाऊ असा परिवार आहे.
