जळगावच्या पिंप्राळा हुडको परिसरातील घटना
जळगाव, (प्रतिनिधी) – शहरात चोरीच्या संशयावरून एका १९ वर्षीय तरुणाला लाकडी दांडके आणि लोखंडी वस्तूने बेदम मारहाण केल्याची खळबळजनक घटना पिंप्राळा हुडको परिसरात घडली आहे. याप्रकरणी रामानंद नगर पोलीस ठाण्यात तिघांविरुद्ध गुन्हा दाखल करण्यात आला आहे.
फिर्यादी हमीद अब्बास खाटीक (वय ४९, रा. उस्मानिया पार्क, उमर कॉलनी) यांचा मुलगा अबरार ऊर्फ चिरक्या (वय १९) याच्यावर आरोपींनी चोरी केल्याचा संशय घेतला. याच कारणावरून मंगळवार, २४ मार्च रोजी दुपारी ३ ते ३.३० वाजेच्या सुमारास पिंपराळा हुडको भागात अबरारला गाठून आरोपींनी त्याला शिवीगाळ व दमदाटी करण्यास सुरुवात केली.
वाद विकोपाला गेल्यावर आरोपींनी अबरारला लाकडी दांडक्याने आणि लोखंडी आसारीने उजव्या पायाच्या मांडीवर आणि कमरेवर जबर मारहाण केली. या हल्ल्यात अबरार गंभीर जखमी झाला असून, त्याच्यावर उपचार सुरू आहेत.
याप्रकरणी हमीद खाटीक यांनी दिलेल्या फिर्यादीवरून संशयित आरोपी सुपडू (पूर्ण नाव माहीत नाही), पंकज (पूर्ण नाव माहीत नाही), किरण अशोक सपकाळे (सर्व रा. पिंपराळा हुडको, जळगाव) यांच्याविरुद्ध गुन्हा दाखल करण्यात आला आहे. सदर घटनेचा पुढील तपास रामानंद नगर पोलीस ठाण्याचे पोलीस हेड कॉन्स्टेबल भिका खाटीक करत आहेत. अद्याप कोणालाही अटक करण्यात आलेली नाही.
