जळगावात चोरट्यांचा सुळसुळाट
जळगाव (प्रतिनिधी) – शहरातील जुना खेडी रोडवरील गीताई नगर भागात भरवस्तीत घरफोडीची धाडसी घटना घडली आहे. अज्ञात चोरट्यांनी घराच्या मागील दरवाजाची जाळी कापून आत प्रवेश करत सोन्या-चांदीच्या दागिन्यांसह रोख रक्कम, असा एकूण १ लाख ६१ हजार ५०० रुपयांचा मुद्देमाल चोरून नेला आहे.
फिर्यादी भरत अशोक खडके (रा. प्लॉट नं. ०६, गीताई नगर, जुना खेडी रोड) हे २१ मार्च रोजी रात्री घरात झोपलेले असताना ही घटना घडली. २१ मार्चच्या रात्री १२ वाजेपासून ते २२ मार्चच्या पहाटे ५ वाजेच्या सुमारास अज्ञात चोरट्याने त्यांच्या घराच्या मागील लोखंडी दरवाजाच्या तारेची जाळी कापली. त्यानंतर दरवाजाचे कुलूप तोडून चोरट्याने घरात प्रवेश केला.
घरातील लोखंडी कपाटाच्या ड्रॉवरमध्ये ठेवलेले सोन्या-चांदीचे दागिने आणि रोख रक्कम चोरट्याने लंपास केली. २२ मार्च रोजी दुपारी याप्रकरणी जळगाव पोलीस स्टेशनमध्ये गुन्हा दाखल करण्यात आला आहे.
चोरट्यांनी एकूण १,६१,५०० रुपयांच्या वस्तू चोरल्या आहेत. घटनेची माहिती मिळताच उपविभागीय पोलीस अधिकारी नितीन गणपुरे आणि प्रभारी अधिकारी कावेरी कमलाकर यांनी घटनास्थळी भेट देऊन पाहणी केली. याप्रकरणी जळगाव पोलीस स्टेशनमध्ये गुन्हा दाखल करण्यात आला आहे. पुढील तपास पोलीस उपनिरीक्षक संतोष खेडकर करत आहेत. या घटनेमुळे परिसरात भीतीचे वातावरण पसरले असून, चोरट्यांचा शोध घेण्याचे आव्हान पोलिसांसमोर आहे.
