भुसावळ बस स्थानकाजवळ पोलिसांची कारवाई
भुसावळ (प्रतिनिधी):- भुसावळ शहर पोलीस दलाच्या बाजारपेठ पोलिसांनी बस स्थानक परिसरात धडक कारवाई करत एका तरुणाला गावठी पिस्तूलसह रंगेहात अटक केली आहे. अटक करण्यात आलेला तरुण मध्य प्रदेशातील भोपाळ येथील रहिवासी असून, त्याच्याकडून ३५ हजार रुपये किमतीचे अग्निशस्त्र जप्त करण्यात आले आहे.
सोमवार, १६ मार्च रोजी दुपारी १:१५ वाजेच्या सुमारास भुसावळ बस स्थानकाच्या गेटजवळील रिक्षा स्टँडजवळ एक तरुण संशयास्पदरीत्या वावरत असल्याची माहिती पोलिसांना मिळाली. बाजारपेठ पोलीस स्टेशनच्या पथकाने तातडीने त्या ठिकाणी जाऊन संशयिताची झडती घेतली असता, त्याच्याकडे विनापरवाना गावठी बनावटीचे पिस्तूल मिळून आले. ३५ हजार रुपये किमतीचे एक लोखंडी गावठी पिस्तूल (मॅगझिनसह) जप्त करण्यात आले आहे. शादाब रईस कुरेशी (वय ३५, रा. बाग फरहत अफजा हुजूर सिकंदरी, भोपाळ, मध्य प्रदेश) असे अटक करण्यात आलेल्या आरोपीचे नाव आहे.
जिल्हाधिकाऱ्यांच्या प्रतिबंधात्मक आदेशाचे उल्लंघन करून विनापरवाना शस्त्र बाळगल्याप्रकरणी त्याला रात्री २१:५२ वाजता रीतसर अटक करण्यात आली आहे. याप्रकरणी पोलीस नाईक सोपान पंडित पाटील यांच्या फिर्यादीवरून बाजारपेठ पोलीस ठाण्यात गुन्हा दाखल करण्यात आला आहे. सदर कारवाई भुसावळ बाजारपेठ पोलीस स्टेशनचे पोलीस निरीक्षक राहुल टी. वाघ यांच्या मार्गदर्शनाखाली करण्यात आली. या घटनेचा पुढील तपास पोलीस हेड कॉन्स्टेबल विजय बळीराम नेरकर करत आहेत.
