५० हजारांचा मुद्देमाल लंपास
जळगाव (प्रतिनिधी):- शहरात घरफोडीच्या घटनांचे सत्र सुरूच असून, जिल्हापेठ पोलीस स्टेशनच्या हद्दीतील एका फर्निचरच्या दुकानाचे शटर तोडून चोरट्यांनी ५० हजार रुपयांचा मुद्देमाल लांबवल्याची घटना समोर आली आहे. याप्रकरणी अज्ञात चोरट्यांविरुद्ध गुन्हा दाखल करण्यात आला आहे.
जळगाव शहरातील पोलीस लाईन समोरील ‘हर्षल एजन्सी’ नावाचे फर्निचरचे दुकान निळकंठ आनंदा नारखेडे (वय ५९, रा. नंदनवन कॉलनी) यांच्या मालकीचे आहे. १० मार्च रोजी रात्री ८ वाजेच्या सुमारास दुकान बंद केल्यानंतर, १० मार्च ते ११ मार्चच्या सकाळी ९:३० वाजेच्या दरम्यान अज्ञात चोरट्यांनी दुकानाचे लोखंडी शटरचे कुलूप तोडून आत प्रवेश केला.
चोरट्यांनी दुकानातून वस्तू आणि रोख रक्कम चोरून नेली आहे. यात ५ कुलर (किंमत २५,००० रुपये, निलकंमल कंपनीची ॲल्युमिनियमची सीडी (किंमत ३,००० रुपये), रोख रक्कम एकूण २२,००० रुपये, असा एकूण ५०,००० रुपयांचा मुद्देमाल लंपास करण्यात आला आहे.
याप्रकरणी निळकंठ नारखेडे यांनी दिलेल्या फिर्यादीवरून जिल्हापेठ पोलीस स्टेशनमध्ये नोंद करण्यात आली आहे. जिल्हापेठ पोलीस स्टेशनचे सहाय्यक पोलीस निरीक्षक अनिल वाघ यांच्या मार्गदर्शनाखाली पोलीस नाईक कमलेश पवार या घटनेचा पुढील तपास करत आहेत. अद्याप या प्रकरणात कोणालाही अटक झालेली नाही.
