जळगाव पोलीस दलाचा मोठा पुढाकार; २.९७ कोटींच्या ‘भरोसा सेल’ इमारतीचा भूमिपूजन सोहळा संपन्न
जळगाव (प्रतिनिधी):- महिला व बालकांच्या सुरक्षेसाठी आणि त्यांच्या तक्रारींचे तत्पर निवारण करण्यासाठी जळगाव पोलीस दलाने एक महत्त्वाचे पाऊल उचलले आहे. पोलीस अधीक्षक कार्यालय परिसरात नियोजित ‘भरोसा सेल व समुपदेशन केंद्र’ इमारतीचा भूमिपूजन सोहळा आज, ८ मार्च रोजी उत्साहात पार पडला. जिल्ह्याचे पालकमंत्री तथा पाणी पुरवठा व स्वच्छता मंत्री गुलाबराव पाटील यांच्याहस्ते या इमारतीची पायाभरणी करण्यात आली.
कौटुंबिक हिंसाचार, महिलांवरील अत्याचार आणि बालकांशी संबंधित तक्रारींवर प्रभावी उपाययोजना करण्यासाठी हे केंद्र अत्यंत आधुनिक सोयी-सुविधांनी सज्ज असणार आहे. पीडितांना कायदेशीर मदत, मानसिक समुपदेशन आणि पोलीस साहाय्य अशा सर्व सेवा ‘एकाच छताखाली’ उपलब्ध करून देणे, हा या प्रकल्पाचा मुख्य उद्देश असल्याचे पोलीस अधीक्षक डॉ. महेश्वर रेड्डी यांनी आपल्या प्रास्ताविकात स्पष्ट केले.
प्रकल्पाचे तांत्रिक व आर्थिक तपशील
निधी: जिल्हा नियोजन समिती (DPDC) कडून या प्रकल्पासाठी २ कोटी ९७ लाख रुपयांच्या निधीला मंजुरी मिळाली आहे. सार्वजनिक बांधकाम विभागाच्या देखरेखीखाली हे काम होणार असून, चाळीसगाव येथील मे. जगन्नाथ इन्फ्रा कंपनी या कंत्राटदार संस्थेमार्फत बांधकाम पूर्ण केले जाईल.
कार्यकारी अभियंता राहुल दे. पाटील व उपविभागीय अधिकारी सुनिल ल. देवरे यांचे या प्रकल्पाला तांत्रिक मार्गदर्शन लाभत आहे. या सोहळ्याला अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे, जिल्हा विशेष शाखेचे पोलीस निरीक्षक सतीश गोराडे, स्थानिक गुन्हे शाखेचे पोलीस निरीक्षक राहुल गायकवाड यांच्यासह शहरातील विविध पोलीस ठाण्यांचे प्रभारी अधिकारी व कर्मचारी उपस्थित होते. कार्यक्रमाचे सूत्रसंचालन आणि आभार प्रदर्शन नितीन गणापुरे यांनी केले.
“सामाजिक सुरक्षिततेच्या दृष्टीने जळगाव पोलीस दलाचा हा उपक्रम मैलाचा दगड ठरेल. पीडित महिलांना न्याय मिळवून देण्यासाठी अशा आधुनिक केंद्रांची गरज आहे.”
— ना. गुलाबराव पाटील, पालकमंत्री, जळगाव
