गोदावरी व्यवस्थापन महाविद्यालयाचा उपक्रम
जळगाव ( प्रतिनिधी ) – गोदावरी व्यवस्थापन महाविद्यालयातील विद्यार्थ्यांनी आपल्या औद्योगिक भेटीतून राजस्थानच्या औद्योगिक उलाढालीची माहिती घेतली.
राजस्थान येथे शैक्षणिक व औद्योगिक भेट दौर्यांतर्गत राजस्थानी कॉटेज इंडस्ट्रीज, दिव्या स्टोन (जोधपूर) तसेच राजस्थान खादी उद्योग, जयपूर या नामांकित उद्योगांना विद्यार्थ्यांनी भेट दिली. राजस्थानी कॉटेज इंडस्ट्रीज व राजस्थान खादी उद्योग, जयपूर येथे कुर्ता, साडी, पारंपरिक पोशाख, प्रिंटिंग, कलर प्रिंटिंग, डिझाईन कपडा तसेच हँडलूम उत्पादन प्रक्रियेची प्रत्यक्ष माहिती आणि वस्त्रनिर्मितीपासून मॅन्युफॅक्चरिंग, सप्लाय आणि होलसेल स्तरावर चालणार्या व्यवसायाची कार्यपद्धती समजावून सांगण्यात आली. अरावली पर्वतरांगांतील खाणी परिसरात कार्यरत राजस्थानच्या वैशिष्ट्यपूर्ण गुलाबी दगडावर प्रक्रिया व कटिंगचे काम करणाऱ्या दिव्या स्टोन, जोधपूर कंपनीत मार्बल, ब्लॉक्स, टाइल्स, ग्रॅनाईट ब्लॉक्स तसेच स्टोन मॅन्युफॅक्चरिंगच्या विविध टप्पे तसेच खाणीतून दगड काढण्यापासून ते त्यावर प्रक्रिया व कटिंग करून अंतिम उत्पादन तयार होईपर्यंतचा संपूर्ण प्रवास विद्यार्थ्यांनी प्रत्यक्ष पाहिला.याचबरोबर विविध औद्योगिक प्रकल्प, उत्पादन प्रक्रिया, व्यवस्थापन पद्धती तसेच आधुनिक तंत्रज्ञानाची प्रत्यक्ष माहिती मिळवत उद्योगातील तज्ज्ञांशी संवाद साधत विद्यार्थ्यांनी प्रत्यक्ष कामकाज समजून घेतले. शैक्षणिक अभ्यास प्रत्यक्ष अनुभवाशी जोडणे, हा या औद्योगिक भेटीचा मुख्य उद्देश होता. यावेळी गुणवत्ता नियंत्रण, सुरक्षा उपाययोजना तसेच रोजगाराच्या संधींबाबतही विद्यार्थ्यांना मार्गदर्शन करण्यात आले.या दौर्यात विद्यार्थ्यांसोबत महाविद्यालयाचे संचालक डॉ. प्रशांत वारके, डॉ. नीलिमा वारके, डॉ. प्राजक्ता पाटील, प्रा. चंद्रकांत डोंगरे तसेच इतर शिक्षकवृंद उपस्थित होते.
