चोपडा, ( प्रतिनिधी ) : – चोपडा शहरातील शेतपुरा परिसरात पोलिसांनी विनापरवाना गौण खनिजाची वाहतूक करणाऱ्या छोट्या मालवाहू ट्रकवर कारवाई केली. या कारवाईत ट्रक आणि त्यातील वाळू असा एकूण ७ लाख ६ हजार रुपयांचा मुद्देमाल जप्त करण्यात आला आहे. याप्रकरणी चोपडा शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ९ ऑक्टोबर २०२६ रोजी रात्री ११ ते १० ऑक्टोबर रोजी पहाटे ५ वाजेपर्यंत पोलीस पथक गस्तीवर होते. यावेळी पोलीस कर्मचारी आणि रात्रीच्या तपासणीसाठी नियुक्त पथक शासकीय वाहनाने परिसरात गस्त घालत होते.
१० ऑक्टोबर रोजी पहाटे सुमारे १.४५ वाजता शेतपुरा परिसरातील नवग्रह मंदिरासमोरील सार्वजनिक रस्त्यावर पेट्रोलिंग सुरू असताना, अशोक लेलँड कंपनीचा छोटा मालवाहू ट्रक (क्रमांक एमएच-१९-सीवाय-६३८४) आढळून आला. या ट्रकमधून कोणताही वैध पास किंवा परवाना नसताना वाळूची वाहतूक केली जात असल्याचे पोलिसांच्या निदर्शनास आले.
त्यानंतर पोलिसांनी संबंधित ट्रक आणि त्यातील गौण खनिज ताब्यात घेतले. ट्रकची किंमत अंदाजे ७ लाख रुपये, तर वाळूची किंमत ६ हजार रुपये असून, एकूण ७ लाख ६ हजार रुपयांचा मुद्देमाल जप्त करण्यात आला.
या प्रकरणी चोपडा शहर पोलीस ठाण्यात गुन्हा रजिस्टर क्रमांक ४१३/२०२६ अन्वये भारतीय न्याय संहितेच्या कलम ३०३(२) अंतर्गत गुन्हा नोंदविण्यात आला आहे. या प्रकरणातील आरोपीला अद्याप अटक करण्यात आलेली नसल्याची नोंद पोलिसांच्या माहितीमध्ये आहे.
या गुन्ह्याचा पुढील तपास पोलीस कर्मचारी विनोद पाटील करीत आहेत.
