जळगाव स्थानिक गुन्हे शाखेची कारवाई
जळगाव (प्रतिनिधी):- शहरात गावठी कट्टा बाळगून दहशत निर्माण करणाऱ्या एका २१ वर्षीय तरुणाला स्थानिक गुन्हे शाखेने अटक केली आहे. त्याच्याकडून १ गावठी कट्टा आणि ३ जिवंत काडतुसे जप्त करण्यात आली आहेत.
जळगाव जिल्ह्याचे पोलीस अधीक्षक डॉ. महेश्वर रेड्डी यांनी जिल्ह्यात बेकायदेशीर अग्निशस्त्रे बाळगणाऱ्यांवर कडक कारवाई करण्याचे आदेश दिले होते. या मोहिमेदरम्यान, १० फेब्रुवारी रोजी स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना गुप्त माहिती मिळाली की, शाहुनगर भागातील मोहम्मद साद अय्युब खान हा तरुण उस्मानिया पार्क परिसरात मोटारसायकलवर गावठी कट्टा घेऊन फिरत आहे.
स्थानिक गुन्हे शाखेच्या पथकाने रात्रीच्या वेळी उस्मानिया पार्क परिसरात सापळा रचून मोहम्मद साद याला ताब्यात घेतले. त्याची झडती घेतली असता त्याच्याकडे एक गावठी कट्टा आणि ३ जिवंत काडतुसे सापडली. पोलिसांनी त्याचे शस्त्र आणि मोटारसायकल जप्त केली आहे. याप्रकरणी जळगाव शहर पोलीस ठाण्यात गुन्हा दाखल करण्यात आला आहे. आरोपीला पुढील कारवाईसाठी जळगाव शहर पोलिसांच्या ताब्यात देण्यात आले असून, पोलीस हवालदार सुनील पाटील या प्रकरणाचा पुढील तपास करत आहेत.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पार पडली. या मोहिमेत वरिष्ठ पोलीस निरीक्षक राहुल गायकवाड, पोलीस उपनिरीक्षक शरद बागल, अतुल वंजारी, विजय पाटील, अक्रम शेख, नितीन बावीस्कर, विलेश सोनवणे, किशोर पाटील आणि रवींद्र कापडणे यांच्या पथकाने सहभाग घेतला.
