सोमवारी १६ तारखेला महासभेला होणार घोषणा
जळगाव ( प्रतिनिधी ) – जळगाव शहर महानगरपालिकेच्या सतरा मजली इमारतीमधील महापौर दालनात बुधवारी दि. ११ रोजी आयोजित पत्रकार परिषदेत आगामी विषय समित्यांच्या संख्याबळाची अधिकृत माहिती देण्यात आली. महापौर दीपमाला काळे आणि उपमहापौर मनोज चौधरी यांनी यावेळी समितीमधील पक्षनिहाय बलाबल स्पष्ट केले.
येत्या सोमवारी दि. १६ रोजी सकाळी ११ वाजता महासभेचे आयोजन करण्यात आले असून, या सभेत दोन्ही महत्त्वाच्या समित्यांच्या सदस्यांची नावे अंतिम केली जाणार आहेत.स्थायी समितीमध्ये भाजपचे १०, शिवसेनेचे ५, तर शिवसेना ठाकरे गटाचा १ सदस्य असेल. तसेच महिला व बालकल्याण समितीमध्ये भाजप ५, शिवसेना ३ आणि शिवसेना ठाकरे गटाचा १ सदस्य अशा पद्धतीने संख्याबळ निश्चित करण्यात आले आहे.
सोमवारच्या महासभेत सदस्यांची नावे निश्चित झाल्यानंतर, दोन्ही समित्यांच्या सभापती निवडीसाठीची नावे विभागीय आयुक्तांकडे पाठवली जातील. तिथे सभापतींच्या नावांना अधिकृत मंजुरी दिली जाईल. या पत्रकार परिषदेला भाजपचे गटनेते प्रकाश बालानी, उपगटनेते नितीन बरडे, प्रतोद डॉ. चंद्रशेखर पाटील, महानगर जिल्हाध्यक्ष दीपक सूर्यवंशी, शिवसेनेचे गटनेते विष्णू भंगाळे, शिवसेना ठाकरे गटाचे गटनेते इब्राहिम पटेल आणि राष्ट्रवादी काँग्रेस (अजित पवार गट) गटनेते प्रफुल्ल देवकर उपस्थित होते.
