६ तारखेला होणार बिनविरोध निवड, दोन्ही पक्ष नेतृत्वाकडून अखेर निष्ठावानांना मिळाली संधी
जळगाव विशेष प्रतिनिधी – येथील महानगरपालिकेच्या सतराव्या महापौर म्हणून भारतीय जनता पक्षातर्फे प्रभाग क्रमांक ७ मधून बिनविरोध निवडून आलेल्या दीपमाला मनोज काळे यांची पक्षाकडून निवड होत आहे. तर दुसरीकडे उपमहापौर म्हणून शिवसेना शिंदे गटाने देखील निष्ठावंताला संधी देत चौथ्यांदा नगरसेवक झालेले मनोज सुरेश चौधरी यांना संधी दिली आहे. दोघेही दुपारपर्यंत आपले अर्ज भरणार आहेत.
जळगाव शहर महानगरपालिकेच्या निवडणुकीमध्ये भारतीय जनता पक्षाने सर्वाधिक ४६ जागा जिंकून आपले बहुमत देखील सिद्ध केले आहे. तर त्यांचे मित्र पक्ष शिवसेना शिंदे गट देखील २३ पैकी २२ जागा जिंकून दुसऱ्या क्रमांकावर आहे. महानगरपालिकेमध्ये महायुतीने मिळून ७५ पैकी ७० जागा संपादित केले आहेत. त्यामुळे आता महापौर व उपमहापौर निवडीवेळी बहुमताने व एकमतान मंजुरी मिळणार आहे. महापौरपद भाजपकडे तर उपमहापौर पद शिवसेनेकडे आहे.
महापौरपदाचे आरक्षण ओबीसी महिला या प्रवर्गासाठी निघाले. त्यामुळे ओबीसी महिला प्रवर्गमधून निवडून आलेल्या ५ महिलांपैकी भाजपने आता दीपमाला मनोज काळे या तीसऱ्यांदा निवडून आलेल्या व बिनविरोध झालेल्या महिला नगरसेविकेला संधी दिली आहे. दीपमाला काळे यांना सव्वा वर्ष किंवा अडीच वर्ष अशी संधी मिळणार आहे. दीपमाला काळे यांच्या नियुक्तीमुळे आता भाजपच्या गोटात आनंदाचे वातावरण आहे. कारण, निष्ठावंतांना संधी मिळणार की पहिल्यांदाच नगरसेवक झालेल्या नगरसेविकेला हा प्रश्न अनेक दिवसांपासून चर्चेत होता.
दुसरीकडे शिवसेनेकडे देखील चौथ्यांदा नगरसेवक झालेले मनोज सुरेश चौधरी हे प्रबळ दावेदार होते. त्यामुळे अपेक्षाप्रमाणे उपमहापौर पदाची धुरा आता त्यांच्याकडे सोपवली जात आहे. दुपारी २ वाजेच्याआधी दोन्ही उमेदवार आपले अर्ज महापालिकेमध्ये अधिकाऱ्यांकडे सादर करणार आहेत. त्यानंतर शुक्रवारी दि. ६ रोजी दोघांची बिनविरोध निवड निश्चित मानली जात आहे.
