डॉ. वीरेन खडके, वैशाली अमित पाटील, गणेश सोनवणे, अंकिता पंकज पाटील बिनविरोध निश्चित
जळगाव महापालिकेत महायुतीच्या समर्थकांचा प्रचंड जल्लोष
जळगाव ( प्रतिनिधी ) – जळगाव शहर महानगरपालिकेच्या निवडणुकीमध्ये माघारीअंती आता महायुतीच्या १२ जागा बिनविरोध झाल्या आहेत. भारतीय जनता पक्षाच्या ६ तर शिवसेनेच्या ६ जागा आता निश्चित झाल्या आहे. त्यामुळे ६३ जागांसाठी आता निवडणूक होणार आहे.
आतापर्यंत भारतीय जनता पार्टीचे ६ व शिवसेनेचे ६ असे एकूण १२ उमेदवार महायुतीचे बिनविरोध निवडून आले आहेत. यामध्ये भाजपच्या गायत्री बेंडाळे यांनी १२ ब मधून विजयाचा श्री गणेशा केल्यानंतर गुरुवारी माघारीच्या पहिल्या दिवशी शिवसेनेचे मनोज सुरेश चौधरी, प्रतिभा गजानन देशमुख आणि डॉ. गौरव चंद्रकांत सोनवणे हे बिनविरोध निश्चित झाले. यानंतर शुक्रवार दि. २ जानेवारी रोजी माघारीच्या दुसऱ्या व अंतिम दिवशी सकाळी राष्ट्रवादी काँग्रेस पार्टी शरद पवार गटाचे उमेदवार सरला सुनील सोनवणे यांनी आपला अर्ज माघारी घेतला. त्यामुळे शिवसेनेचे रेखा चुडामण पाटील हे बिनविरोध निश्चित झाले आहेत.
नंतर दुपारी दीड वाजेच्या सुमारास प्रभाग क्रमांक ७ क मध्ये शेवटच्या अपक्ष उमेदवाराने माघार घेतल्यानंतर आमदार राजूमामा भोळे यांचे सुपुत्र विशाल सुरेश भोळे यांचा विजय निश्चित झाला आहे. प्रभाग क्रमांक ७ अ मध्ये भाजपच्या दीपमाला मनोज काळे यांच्या विरोधात शिवसेना ठाकरे गटाच्या जयश्री भिकन हिवराळे यांनी दुपारी माघार घेताच बिनविरोध निवडीचे चित्र निश्चित झाले. यानंतर प्रभाग २ अ मध्ये शिवसेनेचे सागर श्याम सोनवणे यांच्या विरोधात छाननीअंती ५ अपक्ष उमेदवारांनी माघार घेतली.
दुपारी भाजपाचे प्रभाग क्रमांक १६ अ डॉ. विश्वनाथ खडके, प्रभाग १३ क मध्ये वैशाली अमित पाटील, ७ ब अंकिता पंकज पाटील आणि शिवसेनेचे १९ ब मधून गणेश उर्फ विक्रम सोनवणे हे बिनविरोध निश्चित झाले आहे. त्यामुळे महायुतीची संख्या आता १२ वर पोहोचली आहे. एकूण ६३ जागांसाठी आता निवडणूक लढवली जाणार आहे.
