महापालिकेच्या निवडणुकीत शिवसेनेला मिळाली चौथी जागा
जळगाव विशेष प्रतिनिधी
जळगाव शहर महानगरपालिकेच्या निवडणुकीत माघारीच्या दुसऱ्या दिवशी मेहरूण परिसरातील प्रभाग क्रमांक १९ अ मध्ये राष्ट्रवादी काँग्रेस पार्टी शरद पवार गटाच्या उमेदवाराने माघार घेतल्यामुळे शिवसेनेच्या उमेदवाराच्या विजयाचा मार्ग मोकळा झाला. रेखा चुडामण पाटील या आता बिनविरोध निश्चित झाले आहेत.
आतापर्यंत भारतीय जनता पार्टीचे १ व शिवसेनेचे ४ असे एकूण ५ उमेदवार महायुतीचे बिनविरोध निवडून आले आहेत. यामध्ये भाजपच्या गायत्री बेंडाळे यांनी १२ ब मधून विजयाचा श्री गणेशा केल्यानंतर गुरुवारी माघारीच्या पहिल्या दिवशी शिवसेनेचे मनोज सुरेश चौधरी, प्रतिभा गजानन देशमुख आणि डॉ. गौरव चंद्रकांत सोनवणे हे बिनविरोध निश्चित झाले.
यानंतर शुक्रवार दि. २ जानेवारी रोजी माघारीच्या दुसऱ्या व अंतिम दिवशी सकाळी राष्ट्रवादी काँग्रेस पार्टी शरद पवार गटाचे उमेदवार सरला सुनील सोनवणे यांनी आपला अर्ज माघारी घेतला. तसेच या प्रभागात मध्ये गुरुवारी पूजा गणेश पाटील आणि सुजाता सतीश चौधरी या दोन अपक्ष उमेदवारांनी माघार घेतली होती. त्यामुळे आता शिवसेनेचे रेखा चुडामण पाटील हे बिनविरोध निश्चित झाले आहेत. विजयानंतर रेखा पाटील यांच्या समर्थकांनी जल्लोष केला.
