जळगाव शहरातील अक्सा नगर येथील घटना, आ. राजूमामा भोळेंकडून अधिकाऱ्यांची खरडपट्टी
जळगाव ( प्रतिनिधी ) – शहरातील अक्सानगर परिसर संतोषी माता मंदिर रस्त्यावर आज शुक्रवारी सकाळी १०.३० वाजेच्या सुमारास एक हृदयद्रावक घटना घडली आहे. उच्चदाबाच्या विद्युत वाहिनीचा झटका बसल्याने बाप-लेकीचा मृत्यू झाला असून लहान भाची गंभीर जखमी झाली आहे.
मास्टर कॉलनीजवळ असलेल्या अक्सानगर परिसरात मौलाना साबीर खान नवाज खान (वय-४०) हे पत्नी, आई, वडील आणि २ मुली, १ मुलासह राहतात. शुक्रवारी सकाळी १०.३० वाजेच्या सुमारास मोठी भाची मारिया फातेमाबी (वय-१२) ही घराच्या गच्चीवर कपडे वाळत घालण्यासाठी गेलेली होती. कपडे वाळत घालताना तिचा स्पर्श जवळच असलेल्या उच्चदाब विद्युत वाहिनीला झाला.
मारिया हिस विजेचा झटका बसल्याचे पाहून मामे बहीण आलिया (वय-१६) हिने तिला वाचवण्याचा प्रयत्न केला. मात्र तिला देखील विजेचा झटका बसला. दोन्ही मुली संकटात असल्याचे पाहून मौलाना साबीर खान यांनी धाव घेतली. त्यांना देखील विद्युत वाहिनीचा च्या धक्का बसला.
उच्च दाब विद्युत वाहिनीचा जोरदार झटका बसल्यामुळे मौलाना साबीर खान, त्यांची मुलगी आलिया यांचा जागीच मृत्यू झाला असून भाची मारिया फातिमा ही गंभीर जखमी झाली आहे. जखमी भाची हिस उपचारार्थ खाजगी रुग्णालयात दाखल करण्यात आले आहे. दोघांचे मृतदेह शासकीय वैद्यकीय महाविद्यालय व रुग्णालयात आणण्यात आले आहेत. घटनेची माहिती मिळताच नातेवाईक आणि नागरिकांनी रुग्णालयात गर्दी केली आहे. दरम्यान, महावितरणच्या हलगर्जीपणामुळे ही घटना घडली असल्याचा आरोप नातेवाईकांनी केला आहे.
शासकीय रुग्णालयामध्ये आ. राजूमामा भोळे यांनी भेट दिली. यावेळी त्यांनी संतप्त झालेल्या नातेवाईकांना शांत करीत त्यांचे सांत्वन केले. तसेच महावितरण कंपनीच्या अधिकाऱ्यांना जाब विचारून तात्काळ याबाबत कारवाई करावी अशा सूचना केल्या. घटनेमुळे नागरिकांमध्ये प्रचंड संताप रुग्णालयामध्ये दिसून आला.
