जळगाव तालुक्यातील शिरसोली येथील घटना, कारण अस्पष्ट
जळगाव (प्रतिनिधी) : तालुक्यातील शिरसोली येथील रहिवासी विवाहितेने पंख्याला ओढणीने गळफास लावून घेत आत्महत्या केल्याची घटना गुरुवार दि. ९ ऑक्टोंबर रोजी रात्री साडे आठ ते नऊ वाजेच्या दरम्यान उघडकीस आली आहे. घटना घडली तेव्हा, विवाहितेचे सासू-सासरे हे पुढील खोलीत असल्याची माहिती मिळाली. घटनेप्रकरणी एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते.
प्रियंका श्रीकांत बारी (वय २६, रा.शिरसोली ता. जळगाव) असे मयत विवाहितेचे नाव आहे. तिच्या पश्चात आई, वडील, पती, दोन मुले, सासू-सासरे असा परिवार आहे. (केसीएन)प्रियंकाचे पती श्रीकांत हे हॉटेल चालक असून ग्रामपंचायतमध्ये कॅम्पुटर ऑपरेटर म्हणून जॉब करीत परिवाराचा उदरनिर्वाह करतात. दरम्यान, पोलिसांकडून मिळालेल्या माहितीनुसार, गुरुवारी दि. ९ ऑक्टोबर रोजी रात्री प्रियंकाचे सासू-सासरे हे पुढील खोलीत हॉलमध्ये बसलेले होते तर प्रियंका ही आतल्या खोलीत होती. काही वेळाने कुटुंबीय प्रियंकाच्या खोलीत गेले असता तिने पंख्याला ओढणीने गळफास लावलेला दिसून आला.
यावेळी कुटुंबीयांनी एकच हंबरडा फोडला. दरम्यान ग्रामस्थांच्या मदतीने प्रियंका बारी हिला शासकीय वैद्यकीय महाविद्यालय व रुग्णालयात दाखल केले असता तेथे वैद्यकीय अधिकाऱ्यांनी तपासून मयत घोषित केले.(केसीएन)रुग्णालयात कुटुंबीयांनी मन हेलावणारा आक्रोश केला. दरम्यान प्रियंका हिने आत्महत्या का केली याबाबत कारण अस्पष्ट आहे. प्रियंकाचे माहेर छत्रपती संभाजी नगर जिल्ह्यातील सोयगाव असून माहेरची मंडळी जळगाव येथे येण्यासाठी निघाले आहेत. मागील महिन्यातही शिरसोली गावात एका विवाहितने गळफास लावून आत्महत्या केली होती. घटना प्रकरणी एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते. तर शिरसोली गावावर विवाहितेच्या मृत्यूमुळे शोककळा पसरली आहे.
