शिरसोलीत गुणवंत विद्यार्थी आणि पैलवानांचा गौरव
शिरसोली प्र.बो. (वार्ताहर):- कै. देवेंद्र प्रमोद पाटील प्राथमिक विद्यामंदिर, हिराबाई जगतराव पाटील माध्यमिक विद्यालय, आणि जगतराव बारकू पाटील उच्च माध्यमिक विद्यालय येथे आज संस्थेचे संस्थापक व विद्यमान अध्यक्ष तसेच प्रेरणा ज्येष्ठ नागरिक मंडळाचे अध्यक्ष आप्पासाहेब जगतराव बारकू पाटील यांचा ८१ वा वाढदिवस मोठ्या उत्साहात साजरा करण्यात आला.
या कार्यक्रमाच्या अध्यक्षस्थानी महाराष्ट्र राज्य फेस्कॉमचे अध्यक्ष डी.टी. चौधरी होते. प्रमुख पाहुणे म्हणून वाय.एन. ठोसरे (माजी उपशिक्षणाधिकारी, जिल्हा परिषद जळगाव), रमेश जयस्वाल (माजी कार्यालयीन अधीक्षक, जिल्हा परिषद जळगाव), प्रमोद जगतराव पाटील (शालेय समिती चेअरमन), आणि कल्पना प्रमोद पाटील (प्राचार्या) उपस्थित होते. आप्पासाहेब पाटील यांच्या वाढदिवसानिमित्त, शाळेतील मार्च महिन्यातील एसएससी आणि एचएससी परीक्षांमध्ये विशेष यश मिळवलेल्या गुणवंत विद्यार्थ्यांचा सत्कार करण्यात आला. तसेच, तालुकास्तरीय कुस्ती स्पर्धेत प्रथम आलेल्या पैलवानांचाही गौरव करण्यात आला. यासोबतच, इयत्ता पहिली ते बारावीपर्यंतच्या सर्व विद्यार्थ्यांना शालेय शैक्षणिक साहित्याचे वाटप करण्यात आले. यावेळी मान्यवरांनी आप्पासाहेब पाटील यांच्या जीवनकार्याबद्दल आणि समाजकार्याबद्दल सविस्तर माहिती दिली.
कार्यक्रमाला ॲडव्होकेट धांडे, ज्येष्ठ नागरिक मंडळ सदस्य जळगाव, पुनमचंद भादो माळी (माजी पीक संरक्षण सोसायटी, शिरसोली), मधुकर पानगळे, प्रेरणा ज्येष्ठ नागरिक मंडळ शिरसोडीचे इतर सदस्य, आणि गावातील प्रतिष्ठित नागरिक मोठ्या संख्येने उपस्थित होते.
कार्यक्रमानंतर, आप्पासाहेबांच्या वाढदिवसानिमित्त इयत्ता पहिली ते बारावीपर्यंतच्या विद्यार्थ्यांना गोड स्नेहभोजन देण्यात आले. कार्यक्रमाचे प्रास्ताविक शाळेच्या प्राचार्या कल्पना प्रमोद पाटील यांनी केले, तर सूत्रसंचालन एस.ए. ढाके यांनी केले. विजय पाटील यांनी उपस्थितांचे आभार मानले. या कार्यक्रमाला सर्व शिक्षक व शिक्षकेतर कर्मचारी उपस्थित होते.
