जळगाव एमआयडीसी येथील घटना
जळगाव (प्रतिनिधी) : येथील एमआयडीसी मधील एका कंपनीत काम करीत असताना तरुण कामगाराच्या अंगावर पाईप पडून गंभीर जखमी झाल्याने त्याला शासकीय रुग्णालयामध्ये उपचारासाठी दाखल करण्यात आले होते. उपचार सुरू असताना त्याचा मृत्यू झाल्याची घटना दि. ५ मे रोजी संध्याकाळी साडेचार वाजेच्या सुमारास घडली आहे. या प्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
विक्रम श्रीनाथ सैनिक (वय ४०, रा.फाजीलनगर जि. कुशीनगर, उत्तर प्रदेश, हल्ली मु. सुप्रीम कॉलनी, जळगाव) असे मयत तरुणाचे नाव आहे. तो आई, वडील, पत्नी, दोन मुली, एक मुलगा यांच्यासह राहत होता. अनेक वर्षांपासून तो एमआयडीसी येथील एच.डी. फायर कंपनीत कामाला होता.(केसीएन) दरम्यान रविवारी दि. ४ मे रोजी दुपारी ४ वाजता तो कंपनीत काम करीत असताना त्याच्या अंगावर अचानक मोठे पाईप पडले.
विक्रम सैनी याच्या कमरेच्या उजव्या बाजूला पोटावर पाईप पडल्यामुळे तो गंभीर जखमी झाला. त्याला सोबतच्या कामगारांनी उपचारासाठी तात्काळ शासकीय वैद्यकीय महाविद्यालय व रुग्णालयात उपचारासाठी दाखल केले. उपचार सुरू असताना सोमवार दि. ५ मे रोजी त्याचा उपचार सुरू असताना संध्याकाळी साडेचार वाजता मृत्यू झाला.(केसीएन)या वेळेला परिवाराने आक्रोश केला. दरम्यान कामगाराच्या मृत्यूमुळे एमआयडीसी मध्ये खळबळ उडाली आहे. घटनेप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
