फैजपुर-मुक्ताईनगर बसमधील घटना, सावद्यात गुन्हा दाखल
सावदा (प्रतिनिधी) : सावदा बसस्थानकावरून चांगदेवकडे जाणाऱ्या फैजपूर-मुक्ताईनगर बसमध्ये प्रवास करणाऱ्या एका महिलेच्या गळ्यातील २.६१ लाख रुपये किमतीचे सोन्याचे दागिने अज्ञात चोरट्याने लंपास केल्याची धक्कादायक घटना घडली. ही घटना २४ एप्रिल २०२५ रोजी दुपारी २:५५ वाजेच्या सुमारास घडली. याप्रकरणी सावदा पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
चांगदेव ता. मुक्ताईनगर येथील रहिवासी वंदना सुपडू बोदडे (वय ४८) यांनी याबाबत फिर्याद दिली. वंदना बोदडे सावदा बसस्थानकावरून चांगदेवला जाण्यासाठी फैजपूर-मुक्ताईनगर बस मध्ये बसल्या होत्या. यावेळी अज्ञात चोरट्याने लबाडीच्या उद्देशाने त्यांच्या ताब्यातील ७.११० ग्रॅम वजनाचे सोन्याचे पेंडल आणि २४.७४० ग्रॅम वजनाचे मंगलपोत, एकूण ३१.८५० ग्रॅम सोने (किंमत अंदाजे २,६१,८०७ रुपये) चोरून नेले.
या घटनेची तक्रार सावदा पोलीस ठाण्यात नोंदवण्यात आली असून गुन्हा दाखल करण्यात आला आहे. सावदा पोलीस ठाण्याचे सहाय्यक पोलीस निरीक्षक विशाल पाटील यांच्या मार्गदर्शनाखाली पोलीस उपनिरीक्षक अमोल गर्जे यांच्याकडे तपास सोपवण्यात आला आहे. पोलिसांनी अज्ञात चोरट्याचा शोध सुरू केला असून, परिसरातील सीसीटीव्ही फुटेज तपासले जात आहेत.
