पाटणा ( वृत्तसंस्था ) – सहाय्यक लोको पायलटला दारुची तलफ आल्यानं ट्रेन तासभर उशिरा धावली . ट्रेन स्टेशनवर सोडून लोको पायलट दारू प्यायला निघून गेला होता. बराच वेळ होऊनही ट्रेन न सुटल्याने चौकशी केल्यावर हे स्पष्ट झाले ही घटना बिहारमध्ये घडली आहे.
बिहारमधील समस्तीपूर रेल्वे विभागाच्या हसनपूर स्थानकावर सहाय्यक लोको पायलट दारू पिण्यासाठी गेल्याने एक पॅसेंजर ट्रेन तासाभराहून अधिक काळ स्टेशनवर थांबून होती. राजधानी एक्स्प्रेसला आधी जाऊ देण्यासाठी समस्तीपूर ते सहरसा ही पॅसेंजर ट्रेन हसनपूर स्थानकावर काही वेळ थांबवण्यात आली होती. यावेळी ट्रेनचे असिस्टंट लोको पायलट करणवीर यादव हे इंजिनमधून गायब झाले. सिग्नल देऊनही गाडी न हलल्याने सहाय्यक स्टेशन मास्तरांनी चौकशी केली. ट्रेनला उशीर झाल्याने संतप्त झालेल्या प्रवाशांनीही गोंधळ घातला होता.
अशातच लोको पायलट यादवचा शोध सुरू करण्यात आला. त्याला शोधण्यासाठी रेल्वे पोलिसांना बोलावण्यात आले. पोलीस त्याला शोधत असताना तो मद्यधुंद अवस्थेत स्थानिक बाजारात सापडला. त्याला जागेवर सरळ उभे राहता येत नव्हते, अशी त्याची अवस्था झाली होती. पोलिसांनी या असिस्टंट लोको पायलटला अटक केली असून विभागीय रेल्वे व्यवस्थापक आलोक अग्रवाल यांनी चौकशीचे आदेश दिले आहेत.
