जळगाव ( प्रतिनिधी ) – आर्थिक वर्ष संपत असल्याने विविध शासकीय विभागांसह महापालिका आणि स्थानिक स्वराज्य संस्थांकडून थकबाकी वसुलीबरोबरच प्राप्त व्यपगत होऊ नये म्हणून खर्च करण्याची धावपळ ‘ प्रशासकीय ‘ पातळीवर सुरु आहे.
दोन दिवस ही स्थिती कायम राहणार असून प्रशासनाला २४ तास वेळ अपूर्ण पडत आहे व्यवहार खोळंबून राहू नयेत यासाठी ३१ मार्च रोजी शासकीय व्यवहार हाताळणाऱ्या बँकांच्या शाखा रात्री १२ वाजेपर्यंत सुरू ठेवण्याचे आदेश जिल्हास्तरावरून देण्यात आले आहेत.
विकासकामे, शासकीय योजनांसाठी प्राप्त निधी, कार्यालयीन खर्च व तत्सम बाबींची देयके, कर्मचाऱ्यांची वैद्यकीय देयके मंजूर करून घेण्याकरिता शासकीय कार्यालयांमध्ये लगबग सुरू आहे. या आर्थिक वर्षांत आधी निर्बंधांना सामोरे जावे लागले होते. त्यामुळे दोन महिने शासकीय योजनांसाठी प्राप्त निधीच्या तुलनेत खर्चाचे प्रमाण कमी होते. ३१ मार्चपूर्वी निधीचा विनियोग न झाल्यास तो परत जातो. निधी परत जाणे संबंधित विभागासाठी नामुष्कीची बाब आहे म्हणून शासकीय विभाग झटून कामाला लागले आहेत. शासकीय विभागांची गैरसोय टाळण्यासाठी जिल्हाधिकारी कार्यालयातील मुख्य लेखा व कोषागार विभागासह १५ तालुक्यांमधील उपलेखा व कोषागार कार्यालये पूर्णवेळ सुरू ठेवण्यात येणार आहेत.
स्थानिक स्वराज्य संस्था थकबाकी वसुलीत गुंतल्या आहेत. नव्या आर्थिक वर्षांत रेडिरेकनरचे दर वाढण्याची शक्यता असल्याने तत्पूर्वी दस्तनोंदणीचा अनेकांचा प्रयत्न आहे. त्यामुळे मुद्रांक कार्यालयांमध्ये नागरिकांची गर्दी आहे.
व्यवहार पूर्ण करण्यासाठी भारतीय स्टेट बँकेचा नेहमीचा कार्यालयीन वेळ पुरेसा नसल्याने या दिवशी एसबीआयची कोषागार शाखा, व शासकीय व्यवहार हाताळणाऱ्या अन्य बँकेच्या शाखा रात्री १२ वाजेपर्यंत खुल्या ठेवण्यात येणार आहेत. याबाबतचे आदेश जिल्हा प्रशासनाने दिले आहेत.
