जळगाव (प्रतिनिधी) – जळगाव शहरातील शाहू नगर भागातील पिंप्राळा रोडवरील एका व्यापाऱ्यास दि.२ नोव्हेंबर रोजी चाकूच्या धाकावर लुटणाऱ्या दोघांना एलसीबीच्या पथकाने अटक केली आहे. दीपक जयराज ललवाणी, दीपक भिका चव्हाण असं अटक केलेल्या संशयितांची नावं आहेत.
दि.२ नोव्हेंबर रोजी सायंकाळी साडेसात वाजेच्या सुमारास शहरातील शाहूनगर भागातील पिंप्राळा रोडवरील विलास मुरलीधर नाईक (धंदा कपाट विक्री, रा.पिंप्राळा, वाणी गल्ली) हे त्यांच्या दुकानात एकटे असताना एका अज्ञात इसमाने दुकानात प्रवेश करत मला कपाट घ्यायचे आहे, म्हणून सांगितले. त्यावर श्री.नाईक यांनी आता कपाट शिल्लक नाही, असे बोलतच दुसरा अनोळखी इसम हा हातात चाकू घेऊन दुकानात आला आणि आणि जबरदस्तीने शटर बंद केले. यावेळी चाकूच्या धाकावर दोघा आरोपींनी श्री. नाईक यांच्या खिशातील एक हजार रुपये बळजबरीने काढून घेतले. तसेच टेबलावर ठेवलेला मोबाईल उचलून पळ काढला. यासंदर्भात शहर पोलीस स्थानकात भादवि कलम ३९२,३४ प्रमाणे गुन्हा दाखल करण्यात आला होता.
यासंदर्भात स्थानिक गुन्हे शाखेचे पोलिस निरीक्षक किरणकुमार बकाले यांना गोपनीय माहिती मिळाली की, धरणगाव तालुक्यातील मुसळी फाटा परिसरातील एका शेतात सदर जबरी चोरी करणारे दोघं संशयित आहेत. त्याअनुषंगाने श्री.बकाले यांनी पोलीस उपनिरीक्षक रवींद्र गिरासे, सहाय्यक फौजदार विजय पाटील, विजयसिंह पाटील, जितेंद्र पाटील, दिनेश बडगुजर, प्रीतम पाटील, राहुल पाटील, नरेंद्र वारुळे, नितीन बाविस्कर यांचे पथक रवाना केले. या पथकाने मुसळी फाटा परिसरातून दीपक जयराज ललवानी (वय-३२ रा. मुसळी फाटा ता.धरणगाव), दीपक भिका चव्हाण (वय-३२,रा. इंद्रनिल सोसायटी, जळगाव) या दोघांना मोठ्या शिताफीने ताब्यात घेतले. एवढेच नव्हे तर त्यांच्याकडून गुन्ह्यातील मोबाईल देखील जप्त करण्यात आला आहे.
