जळगाव (प्रतिनिधी) – रावेर शहरातील व्यापारी मोहनलाल पटेल यांनी सायबर पोलीस स्टेशनला तक्रार दिली होती. बांधकामास लागणारे स्टिल मटेरियल पाठवितो, असे सांगत त्यांची १६ लाखांत ऑनलाईन फसवणूक करण्यात आली होती. त्यानुसार, ललितकुमार तुलसीराम खंडेलवाल (वय ३८, रा. छिपावली, ता. जि. सिरोही, राजस्थान) या संशयिताला सायबर पोलिसांनी काही दिवसांपूर्वी सुरतमधून अटक केली आहे.
मोहनलाल देवजी पटेल (वय ६०, रा. गजानन नगर, रावेर) यांनी याबाबत जानेवारी महिन्यात फिर्याद दिली होती. मोहनलाल देवजी पटेल यांना संशयित ललितकुमार खंडेलवाल याने फोनवरून ‘आमची आयएसओ टॉप्स इंडिया मेटल ट्रेडर्स’ नावाची कंपनी आहे. आम्ही तुम्हाला बांधकामासाठी लागणारे स्टिल मटेरियल पाठवितो, असे सांगून विश्वास संपादन केला. १९ ते २१ नोव्हेंबर दरम्यान हा गुन्हा घडला होता. तसेच त्यांना टॅक्स इन्व्हॉईस व बनावट ई बिल पाठवून त्यांच्याकडून वेळोवेळी १६ लाख २७ हजार ८०० रुपये घेऊन त्यांची ऑनलाईन फसवणूक केली. याप्रकरणी गुन्हा दाखल झाल्यानंतर १५ मार्चला संशयित ललितकुमार खंडेलवाल याला सायबर पोलिसांनी सुरतमधून अटक केली.
सदर संशयित आरोपीला अटक करण्यासाठी पोलीस निरीक्षक अशोक उतेकर, पोलीस कर्मचारी श्रीकांत चव्हाण, वसंत बेलदार, प्रवीण वाघ, ललित नारखेडे, स्थानिक गुन्हे शाखेचे ईश्वर धनगर आदींनी सहभाग घेतला.
