अमळनेर (प्रतिनिधी) – तालुक्यातील अंचलवाडी शिवारातील शेतातून महावितरण कंपनीच्या मालकीचे ट्रान्सफार्मर आणि अल्यूमिनीअमच्या तारा असा एकुण ३० हजार रुपये किमतीचा मुद्देमाल चोरी झाला आहे. याबाबत सोमवार २० मार्च रोजी अमळनेर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
तालुक्यातील अंचलवाडी शिवारात असलेले नागराज हिलाल गुजर यांच्या शेताजवळ महावितरण कंपनीच्या मालकीचे ट्रान्सफार्मर आणि अल्युमिनियमच्या तारा असा ३० हजार रूपये किंमतीचा मुद्देमाल ठेवलेला होता. १७ मार्च सायंकाळी ६ नंतर कधीतरी शेतात ठेवलेले ट्रांसफार्मर आणि विद्युत तारा शेतातून आज्ञात चोरट्यांनी चोरून नेला. हा प्रकार उघडकीला आल्यानंतर जानवे येथील महावितरण कंपनीचे वरिष्ठ तंत्रज्ञ संदीप आधार पाटील यांनी घटनास्थळी धाव घेऊन चौकशी केली. सोमवार २० मार्च रोजी त्यांनी अमळनेर पोलीस ठाण्यात धाव घेऊन तक्रार दिली. त्यानुसार अज्ञात चोरट्यांवर अमळनेर पोलीस ठाण्यात गुन्हा दाखल करण्यात आला आहे. पुढील तपास पोलीस नाईक हितेश चिंचोरे करीत आहे.