वरणगाव ( प्रतिनिधी ) – रेफ्रिजरेटरचा डीलर असल्याचे भासवून वरणगाव येथील महिलेची २ लाख ९७ हजार ५०६ रूपयांची फसवणूक झाली आहे. वरणगाव पोलीस ठाण्यात गुन्हा दाखल करण्यात आला आहे.
जयश्री धनराज महाजन (वय-३४ , रा. मकरंद नगर, वरणगाव ) कुटुंबियांसह वास्तव्याला आहे. १७ फेब्रुवारीरोजी दुपारी ते २१ फेब्रुवारी दरम्यान त्यांना सुधीर शर्मा ( रा. १२ चौक स्टेशन रोड गिरिदिह झारखंड ) नामक व्यक्तीने इंडिया मार्टवरून बोलत असल्याचे सांगून स्वतः रेफ्रिजरेटरचा डीलर असल्याचे भासवून माहिती सांगितली. जयश्री महाजन यांचा विश्वास संपादन झाल्यानंतर त्यांनी ३७ रेफ्रिजरेटर, ७ एसी आणि एक वाशिंग मशीन अशी ऑर्डर दिली. ऑर्डर दिल्यानंतर जयश्री महाजन यांनी २ लाख ९७ हजार ५०७ रुपये ऑनलाइन पाठवले. परंतु पैसे पाठवून देखील समोरील व्यक्तीने दिलेल्या ऑर्डरप्रमाणे कोणताही माल घरापर्यंत पोहोचविला नसल्याने त्यांनी वारंवार फोन केले. त्यानंतर कुठलाही प्रतिसाद मिळाला नाही. जयश्री महाजन यांनी वरणगाव पोलीस ठाण्यात धाव घेऊन तक्रार दिली आहे. त्यांच्या तक्रारीवरून वरणगाव पोलीस ठाण्यात सुधिर शर्मा (पूर्ण नाव माहित नाही) या नामक व्यक्ती विरोधात फसवणुकीचा गुन्हा दाखल करण्यात आला आहे. पुढील तपास सपोनि आशिष अडसूळ करीत आहे.
