शनिपेठ पोलिसांत गुन्हा दाखल
जळगाव (प्रतिनिधी):- शहरात माणुसकीला काळिमा फासणारी एक धक्कादायक घटना उघडकीस आली आहे. अवघ्या १३ वर्षांच्या अल्पवयीन मुलीला जीवे मारण्याची धमकी देऊन तिच्यावर वारंवार अत्याचार केल्याचा खळबळजनक प्रकार समोर आला आहे. या प्रकरणी शनिपेठ पोलीस स्टेशनमध्ये संशयित आरोपीविरुद्ध पोक्सोअंतर्गत गुन्हा दाखल करण्यात आला असून संपूर्ण परिसरात संताप व्यक्त केला जात आहे.
जळगावमधील राहणाऱ्या एका १३ वर्षीय बालिकेला संशयित आरोपी दिपक कोळी याने आपल्या जाळ्यात ओढले. पीडित मुलगी आणि आरोपी हे शेजारीच राहतात. दि. १९ फेब्रुवारी ते २८ फेब्रुवारी २०२६ दरम्यान, जेव्हा घरात कोणीही नव्हते, तेव्हा आरोपीने पीडितेच्या घरात प्रवेश केला. “तुझ्या पप्पांना मारून टाकीन,” अशी भीती दाखवून त्याने पीडितेवर जबरदस्तीने शारीरिक संबंध प्रस्थापित केले.
केवळ अत्याचार करूनच आरोपी थांबला नाही, तर तो पीडितेला वारंवार फोन करून त्रास देऊ लागला. पीडित मुलगी शाळेत जात असतानाही तो तिचा रस्ता अडवून तिला भेटण्यासाठी सक्ती करत होता. अखेर या जाचाला कंटाळून आणि भीतीपोटी पीडितेने घडलेला प्रकार आपल्या पालकांना सांगितला.
पीडितेच्या वडिलांनी (वय ४३ वर्षे) दिलेल्या फिर्यादीवरून शनिपेठ पोलीस ठाण्यात गुन्हा दाखल करण्यात आला आहे. घटनेची गंभीर दखल घेत उपविभागीय पोलीस अधिकारी नितीन गणपुरे यांनी घटनास्थळी भेट दिली. या प्रकरणाचा पुढील तपास सहाय्यक पोलीस निरीक्षक साजिद मन्सूरी हे करत आहेत. आरोपीला लवकरात लवकर अटक करून कठोर शिक्षा देण्याची मागणी नागरिकांकडून होत आहे.
