चारचाकी अडवून मारहाण; वाहनाची तोडफोड करून कॅमेरा साहित्य लंपास
यावल (प्रतिनिधी) :- शहरातील आदिवासी प्रकल्प कार्यालयाजवळ आणि एचपी पेट्रोल पंप परिसरात काही तरुणांच्या टोळक्याने भररस्त्यात धुडगूस घालत चारचाकी वाहन अडवून मारहाण व तोडफोड केल्याची घटना घडली. या प्रकरणी यावल पोलीस ठाण्यात गुन्हा दाखल करण्यात आला आहे.
अनिकेत नंदा जाधव (वय २१, रा. जामखेड, जि. अहिल्यानगर) यांनी याबाबत फिर्याद दिली. ते १३ मे २०२६ रोजी रात्री साडेदहा वाजेच्या सुमारास यावल शहरातील आदिवासी प्रकल्प कार्यालयाजवळून जात असताना दोन मोटारसायकलींवर आलेल्या १५ ते २० जणांच्या टोळक्याने त्यांची चारचाकी अडवली.
यानंतर आरोपींनी शिवीगाळ करत फिर्यादी व त्यांच्या सहकाऱ्यांना मारहाण केली. तसेच वाहनाच्या काचा फोडून मोठी तोडफोड केली. वाहनात ठेवलेले फोटोग्राफीचे कॅमेरे व साहित्यही गोंधळात गायब झाल्याचे फिर्यादीत नमूद करण्यात आले आहे.
या प्रकरणी यावल पोलीस ठाण्यात गुन्हा क्रमांक १७९/२०२६ अन्वये भारतीय न्याय संहिता कलम १८९(२), १९१(२), १२६(२), ३२४(४), ११५(२), ३५२, १९० व १९१(३) प्रमाणे गुन्हा दाखल करण्यात आला आहे.
घटनेचा पुढील तपास पोलीस निरीक्षक रंजनाथ धारबळे यांच्या मार्गदर्शनाखाली सुरू आहे.
