स्पिरिटपासून बनावट देशी दारू तयार करणाऱ्या कारखान्यावर राज्य उत्पादन शुल्कची धाड

भरारी पथकाच्या कारवाईत १८ लाख ३२ हजारांचा मुद्देमाल जप्त; बाटल्या, लेबल, बुचे अन् सीलिंग मशीन ताब्यात

जळगाव | प्रतिनिधी : जळगाव जिल्ह्यातील चोपडा तालुक्यात अवैध स्पिरिटपासून बनावट देशी मद्य तयार करणाऱ्या ठिकाणावर राज्य उत्पादन शुल्क विभागाच्या भरारी पथकाने छापा टाकून मोठी कारवाई केली. या कारवाईत बनावट देशी दारूच्या सीलबंद बाटल्या, बनावट लेबल, बुचे, रिकाम्या बाटल्या, सीलिंग मशीनसह तब्बल १८ लाख ३२ हजार ५०० रुपयांचा मुद्देमाल जप्त करण्यात आला.

राज्य उत्पादन शुल्क विभागाच्या भरारी पथकाला २५ ऑगस्ट रोजी चोपडा तालुक्यात अवैधरीत्या बनावट देशी दारू तयार केली जात असल्याची गोपनीय माहिती मिळाली होती. त्यानुसार पथकाने संबंधित ठिकाणी छापा टाकला. कारवाईदरम्यान बनावट देशी मद्य तयार करून त्याची बाटलीबंद पॅकिंग केली जात असल्याचे आढळून आले.

बाटल्या, लेबल आणि सीलिंग मशीन जप्त

छाप्यात बनावट देशी दारूच्या सीलबंद बाटल्या, बनावट लेबल, बुचे, मोठ्या प्रमाणात रिकाम्या बाटल्या, पाणी ओढण्यासाठी वापरण्यात येणारी इलेक्ट्रिक मोटार, पाण्याच्या टाक्या, स्वयंचलित सीलिंग मशीन तसेच बाटलीबंदीसाठी लागणारे अन्य साहित्य जप्त करण्यात आले.

विशेष म्हणजे, जप्त करण्यात आलेल्या मद्याच्या बाटल्यांवर महाराष्ट्रात विक्रीसाठी असल्याचे दर्शविणारी लेबले लावण्यात आल्याचेही समोर आले आहे. त्यामुळे बनावट मद्याची मोठ्या प्रमाणावर निर्मिती करून त्याची विक्री करण्याचा प्रयत्न असल्याचा संशय व्यक्त करण्यात आला आहे.

या प्रकरणी राज्य उत्पादन शुल्क विभागाने संबंधित ज्ञात-अज्ञात आरोपींविरुद्ध गुन्हा दाखल केला असून, बनावट दारू निर्मितीमागील सूत्रधार तसेच या व्यवसायात सहभागी असलेल्या व्यक्तींचा शोध घेण्यासाठी तपास सुरू केला आहे.

ही कारवाई वरिष्ठ अधिकाऱ्यांच्या मार्गदर्शनाखाली भरारी पथकाने केली. आर. व्ही. चव्हाण, दुय्यम निरीक्षक, भरारी पथक, राज्य उत्पादन शुल्क, महाराष्ट्र राज्य, मुंबई यांनी कारवाईबाबत माहिती दिली.

बनावट व अवैध मद्यनिर्मिती करणाऱ्यांविरुद्ध राज्य उत्पादन शुल्क विभागाकडून यापुढेही कठोर कारवाई करण्यात येणार असल्याचे विभागाकडून स्पष्ट करण्यात आले आहे.