डॉ उल्हास पाटील रुग्णालयाच्या आरोग्य केंद्राचे उदघाटन
जळगाव ( प्रतिनिधी ) – एअरपोर्ट ऑथॉरिटी ऑफ इंडिया जळगाव विमानतळ व गोदावरी फौंडेशन संचलित डॉ उल्हास पाटील वैद्यकीय महाविद्यालय यांच्या संयुक्त विद्यमाने जळगाव विमान तळावर मोफत वैद्यकीय सुविधा केंद्र सुरु करण्यात आले. या केंद्रामुळे प्रवासी तसेच कार्यरत कर्मचाऱ्यांना काही वैद्यकीय सुविधांची आवश्यकता भासल्यास त्या तात्काळ मिळणार आहे.
या प्रसंगी जळगाव विमानतळाचे संचालक श्री हर्ष त्रिपाठी, गोदावरी फाऊंडेशनच्या संचालिका डॉ केतकी पाटील, डॉ उल्हास पाटील वैद्यकीय महाविद्यालयाचे डायरेक्टर डॉ एन एस आर्वीकर, वैद्यकीय अधीक्षक डॉ प्रेमचंद पंडित, डॉ सुभाष बडगुजर, प्रशासकीय अधिकारी अशोक भिडे आदी उपस्थित होते. सर्वप्रथम मान्यवरांच्या हस्ते धन्वंतरी देवतेचे पूजन करून श्रीफळ फोडले, त्यांनतर फिट कापून या आपत्कालीन आरोग्य केंद्राचे उद्घाटन झाले. मान्यवरांचे पुष्पगुच्छ देऊन स्वागत करण्यात आले. या प्रसंगी विमानतळ संचालक हर्ष त्रिपाठी यांनी सांगितले कि, अत्यावश्यक सेवांची कधी आवश्यकता भासेल ते सांगता येत नाही त्यामुळे जळगाव विमानतळावर अशी सुविधा उपलब्ध असावी त्यासाठी प्रयत्न सुरु होते, आज येथे आरोग्य सेवा सुरु झाल्याने आम्ही प्रवाशांना ती उपलब्ध करून देऊ शकतो याचा आनंद आहे. त्यांनतर डॉ केतकी पाटील यांनी मनोगतात सांगितले कि, येथे प्रवाशांसह संपूर्ण कर्मचाऱ्यांसाठी आरोग्य सुविधा सुरु करण्यात आली, येथे डॉक्टर्स, नर्सिंग स्टाफ तसेच अत्यावश्यक औषध साठा उपलब्ध असणार आहे. तरी प्रवाशांनी तसेच कर्मचाऱ्यांनी आपल्या आरोग्याकडे दुर्लक्ष न करता वेळीच या आरोग्य केंद्राचा लाभ घ्यावा असे आवाहन डॉ केतकी पाटील यांनी केले. या वेळी विमानतळावरील संपूर्ण स्टाफ उपस्थित होता.
