सायबर पोलीस स्टेशनला सव्वा पाच लाखांच्या फसवणुकीप्रकरणी गुन्हा दाखल
जळगाव (प्रतिनिधी) – भडगाव येथील शेतकऱ्याला विमा पॉलीसीचा परतावा वाढवून देण्याचे अमिष दाखवित ५ लाख २९ हजाराची ऑनलाईन फसवणूक झाल्याची घटना उघडकीस आली आहे. याप्रकरणी बुधवारी १९ जुलै रोजी येथील सायबर पोलिस ठाण्यात गुन्हा दाखल करण्यात आला आहे.
भडगाव तालुक्यातील गुढे येथील शेतकरी दीपक पितांबर चौधरी यांना दि. ४ फेब्रुवारी रोजी दीपक कुमार तिवारी व हेमंत सरकार या अनोळखी इसमांचा फोन आला. त्यांनी आपली ओळख लपवून त्यांनी वेगवेगळ्या क्रमांकावरुन दीपक चौधरी यांना फोन केला. आपण अविवा लाईफ इंन्शूरन्स पॉलीसी कंपनीतून बोलत असल्याचे सांगितले. तसेच तुमच्या विमा पॉलीसीचा परतावा वाढवून देण्याचे अमिष दाखविले.
मात्र त्यांना प्रत्यक्षात कोणताही परतावा न देता दीपक चौधरी या शेतकऱ्याला वेगवेगळी कारणे सांगून शेतकऱ्याकडून सुमारे ५ लाख २९ हजार ५०८ रुपये स्विकारुन त्यांची ऑनलाईन फसवणुक केली. आपली फसवणुक झाल्याचे लक्षात येताच दीपक चौधरी या शेतकऱ्याने जळगाव येथील सायबर पोलिसात धाव घेत तक्रार दिली. त्यानुसार संशयित दीपककुमार तिवारी व हेंमंत सरकार यांच्याविरुद्ध सायबर पोलिसात गुन्हा दाखल करण्यात आला आहे. पोलीस तपास पोलीस निरीक्षक बी. डी. जगताप हे करीत आहे.
