यावल तालुक्यातील पाडळसे येथील घटना
फैजपूर (प्रतिनिधी): यावल तालुक्यातील पाडळसे येथे घराचे काम करत असताना एका २२ वर्षीय तरुण वेल्डरचा विजेचा जोरदार धक्का लागल्याने दुर्दैवी मृत्यू झाला. तौफीक खान अशरफ खान (रा. रविवार पेठ, सावदा, ता. रावेर) असे मृत तरुणाचे नाव आहे.
तौफीक खान हा पाडळसे येथील सुधाकर ओंकार चौधरी यांच्या घरी वेल्डिंग करून खिडकीचे ग्रिल बसवण्याचे काम करण्यासाठी गेला होता. भिंतीला होल पाडत असताना, भिंतीतून गेलेली अंडरग्राउंड इलेक्ट्रिक वायर अचानक कट झाली. त्यानंतर तौफीक जेव्हा त्या ठिकाणी खिळा मारत होता, तेव्हा त्याच्या डाव्या हाताला विजेचा तीव्र धक्का बसला आणि तो जागीच बेशुद्ध पडला.
त्याच्यासोबत काम करणाऱ्या हसन खान आणि अक्रम खान यांनी त्याला तातडीने भुसावळ येथील ‘रिदम हॉस्पिटल’मध्ये दाखल केले. मात्र, उपचार सुरू असतानाच तौफीकची प्राणज्योत मालवली. या घटनेची माहिती मिळताच भुसावळ शहर पोलीस ठाण्यातून शून्य क्रमांकाने कागदपत्रे प्राप्त झाली. त्यानंतर फैजपूर पोलीस ठाण्यात अकस्मात मृत्यूची नोंद दाखल करण्यात आला आहे. सदर घटनेचा पुढील तपास फैजपूर पोलीस स्टेशनचे सहाय्यक पोलीस निरीक्षक रामेश्वर मोताळे यांच्या मार्गदर्शनाखाली सहाय्यक पोलीस उपनिरीक्षक संतोष प्रल्हाद चौधरी करत आहेत. ऐन विशीत असलेल्या तरुणाचा असा अपघाती मृत्यू झाल्याने सावदा परिसरात शोककळा पसरली आहे.
