जळगाव शहरातील आर. आर. विद्यालयातील घटना, कुटुंबीयांचा मन हेलावणारा आक्रोश
जळगाव ( प्रतिनिधी ) :- शहरातील आर.आर.विद्यालयात खेळत असताना अचानक जमिनीवर पडल्याने नववीच्या विद्यार्थ्यांचा मृत्यू झाल्याची धक्कादायक घटना आज दुपारी साडेतीन वाजेच्या सुमारास घडली आहे. जिल्हा पेठ पोलीस स्टेशनला अकस्मात मृत्यूची नोंद करण्यात आली आहे.
कल्पेश वाल्मीक इंगळे (वय १५, रा. कठोरा जि. बुलढाणा ह.मु. कासमवाडी, जळगाव) असे मयत विद्यार्थ्याचे नाव आहे. कल्पेश याच्या पश्चात आई-वडील एक भाऊ आणि एक बहीण असा परिवार आहे. नेहमीप्रमाणे शुक्रवारी ११ जुलै रोजी सकाळी शाळेत आलेला होता. दुपारी ३ वाजता शाळेच्या मधल्या सुट्टीत जेवणासाठी सुट्टी झाली होती.(केसीएन)विद्यार्थ्यांसोबत खेळत असताना तो अचानक जमिनीवर कोसळला, अशी माहिती शाळेच्या शिक्षकांनी दिली आहे. दरम्यान त्याला शिक्षकांनी उचलून तातडीने जवळच असलेल्या एका खाजगी रुग्णालयात दाखल केले. त्यावेळी वैद्यकीय अधिकारी यांनी मयत घोषित केले. कल्पेशच्या आई वडील आणि भाऊ यांनी एकच आक्रोश केला होता.
दरम्यान कल्पेश याच्या आई-वडिलांनी इतर विद्यार्थ्यांकडून त्याला मारहाण झाली असल्याचा आरोप केला. सकाळी गेला तेव्हा तो चांगला होता. दोन दिवसांपूर्वीसुद्धा त्याचा वाद झाला होता, त्यामुळे शाळेचे सीसीटीव्ही कॅमेऱ्यांचे फुटेज तपासण्यात यावे, चौकशी करावी व दोषींवर अटक करून कारवाई करावी त्यानंतरच मृतदेह ताब्यात घेणार असल्याचा पवित्रा मृत कल्पेश याच्या कुटुंबीयांनी घेतला आहे. त्याच्या मृत्यूने या कुटुंबावर मोठा आघात झाला आहे. जिल्हापेठ पोलीस स्टेशनला अकस्मात मृत्यूची नोंद करण्यात आली आहे.
