जळगावात श्रद्धा हाउसिंग सोसायटी येथील घटना
जळगाव (प्रतिनिधी):- शहरात घरफोडीच्या घटना थांबण्याचे नाव घेत नसून, आता एका निवृत्त नायब तहसीलदाराचे घर चोरट्यांनी लक्ष्य केले आहे. जळगाव शहर पोलीस ठाण्याच्या हद्दीतील श्रद्धा हौसिंग सोसायटीत ही घटना घडली असून, चोरट्यांनी घराचा कडी-कोंडा कापून पाणी उपसण्याची मोटार आणि गॅस सिलिंडर चोरून नेले आहे.
जळगाव शहरातील भिकमचंद नगर भागातील श्रद्धा हौसिंग सोसायटीत राहणारे मनोहर सुकलाल ठाकरे (वय ७४, निवृत्त नायब तहसीलदार) हे ४ मार्च ते १ एप्रिल या कालावधीत बाहेरगावी गेले होते. याच संधीचा फायदा घेत अज्ञात चोरट्यांनी त्यांच्या बंद घराच्या दरवाजाचा कडी-कोंडा कापून आत प्रवेश केला.
चोरट्यांनी घरातून ४,००० रुपये किमतीची ‘टेक्समो’ कंपनीची अर्धा अश्वशक्तीची पाण्याची मोटार आणि २,५०० रुपये किमतीचा भारत गॅस कंपनीचा भरलेला एलपीजी सिलिंडर, असा एकूण ६,५०० रुपयांचा मुद्देमाल चोरून नेला आहे.
ठाकरे हे घरी परतल्यानंतर त्यांना चोरी झाल्याचे लक्षात आले. याप्रकरणी त्यांनी २ एप्रिल रोजी जळगाव शहर पोलीस ठाण्यात फिर्याद दिली. पोलिसांनी या प्रकरणी अज्ञात चोरट्यांविरुद्ध गुन्हा दाखल केला आहे. या प्रकरणाचा पुढील तपास पोलीस निरीक्षक सागर शिंपी यांच्या मार्गदर्शनाखाली पोलीस हेड कॉन्स्टेबल उमेश भांडारकर करत आहेत. अद्याप या प्रकरणी कोणालाही अटक करण्यात आलेली नाही.
