जळगाव ( प्रतिनिधी ) – काही दिवसांपासून जिल्ह्यातील हॉटेलचालक व बार मालकांना मारहाण होण्याच्या , गुंड प्रवृत्तीच्या लोकांकडून त्रास देण्याच्या घटना वाढल्या आहेत वरणगाव येथील भांडण सोडविण्यास गेलेल्या हॉटेल मालकाला करण्यात आलेल्या मारहाणीचा जळगाव डिस्ट्रिक्ट वाईन मर्चंट आसोसिएशनतर्फे शनिवारी दुपारपर्यंत सर्व हॉटेल , वाईन शॉप बंद ठेऊन निषेध करण्यात आला .
जिल्हाधिकारी तसेच पोलीस अधीक्षक यांना देखील निवेदन देण्यात आले . या वेळी देण्यात आलेल्या निवेदनात म्हटले आहे की, काही काळापासून शासनमान्य अनुज्ञाप्तीधारक हे व्यवसायीक दृष्टीकोनातून भयंकर अडचणीत आहेत अवैध दारू विक्री, बनावट कारखाने ह्याने तर जिल्हा व राज्य त्रस्त आहेतच परंतु आता अनुज्ञाप्तीधारकांना दुकानात किंवा बाहेर शिवीगाळ , मारहाण केली जाते , पोलीस तक्रार केल्यास अशा आरोपींना शिक्षा न होता जामीन मिळून ते पुन्हा गदारोळ करतात, आता जिल्ह्यात शासनमान्य अनुज्ञाप्तीधारकांमध्ये दहशतीचे वातावरण निर्माण होत आहे, अशा गुन्हेहारांची हिम्मत वाढत आहे, अशा घटना पुन्हा होऊ नयेत यासाठी कडक नियम लागू करावे अवैध विक्री , बनावट मद्य विक्री व बनवणाऱ्यांवर कठोर कारवाई करावी.
वरणगाव येथील घटनेच्या निषेधार्थ पुकारण्यात आलेल्या संपाला १०० टक्के प्रतिसाद मिळाला या संपामुळे शासनाच्या महसुलाचे सुमारे दीड कोटी रुपयांचे तर अधिकृत परवानाधारकांचे देखील लाखो रुपयांचे नुकसान झाले .या वेळी जळगाव डिस्ट्रिक्ट वाईन मर्चंट असोसिएशनचे जिल्हाध्यक्ष ॲड. रोहन बाहेती , शहर तालुका अध्यक्ष सतीश नारखेडे, सचिव पंकज जंगले , ग्रामीण अध्यक्ष राजेंद्र चौधरी , जामनेरचे शंकर मराठे ,चाळीसगावचे उदय पवार , भडगांव-पारोळाचे सुरेश मराठे आदीं पदाधिकारी संपात सहभागी झाले होते.
