बंद घर फोडून चोरट्यांचा डाव
जळगाव (प्रतिनिधी):- शहरातील वाघनगर, राजे संभाजी चौक परिसरात अज्ञात चोरट्यांनी बंद घराचे कुलूप तोडून सुमारे ५४ हजार रुपयांचा मुद्देमाल लंपास केल्याची घटना उघडकीस आली आहे. याप्रकरणी जळगाव तालुका पोलीस ठाण्यात घरफोडीचा गुन्हा दाखल करण्यात आला आहे.
फिर्यादी शिवदास हंसराज नाईक (वय ५७, रा. वाघनगर, राजे संभाजी चौक, जळगाव) यांच्या घरात ही चोरी झाली. चोरट्यांनी घराचे मुख्य दार तोडून आत प्रवेश करत सोन्याचे पदक, अंगठी, चांदीचे दागिने तसेच रोकड असा एकूण ५४ हजार रुपयांचा ऐवज चोरून नेला.
ही घटना १० मे रोजी रात्री ११ ते ११ मे रोजी पहाटे ५.३० वाजेदरम्यान घडल्याचे समोर आले आहे. फिर्यादी यांच्या तक्रारीवरून अज्ञात चोरट्यांविरुद्ध भारतीय न्याय संहितेच्या संबंधित कलमान्वये गुन्हा दाखल करण्यात आला आहे.
या प्रकरणाचा पुढील तपास जळगाव तालुका पोलीस ठाण्याचे पोहेकॉ. प्रविण पाटील करीत आहेत. परिसरातील सीसीटीव्ही फुटेजची तपासणी करून चोरट्यांचा शोध घेतला जात आहे.
