भुसावळ विभागातील कर्मचाऱ्यांची कामगिरी
जळगाव (प्रतिनिधी) : भुसावळ-पुणे या रेल्वेप्रवासादरम्यान तोतया टीसीला पैसे गोळा करताना अहमदनगर येथे भुसावळ विभागातील कार्यरत कर्मचाऱ्यांनी पकडून दौंड कर्मचाऱ्यांच्या स्वाधीन केले आहे. त्याच्यावर कायदेशीर कारवाई करण्याचे काम सुरु होते.
भुसावळ विभागाचे तिकीट तपासणी कर्मचारी अवधीश कुमार आणि जी. टी. साबरे हे दि. १२ जुलै २०२४ रोजी ट्रेन क्र. १२१५० भुसावळ- पुणे दरम्यान सेवेत होते. कार्यरत असताना यावेळी वाणिज्य नियंत्रण पुणे यांच्याकडून त्यांना गोपनीय माहिती मिळाली की, एक संशयित व्यक्ती प्रवाशांचे तिकीट तपासून पैसे गोळा करत आहे. त्यानुसार अहमदनगर येथे रेल्वे आल्यानंतर, दोन्ही कर्मचाऱ्यांनी गाडी क्रमांक १२१५० च्या सामान्य डब्यात प्रवेश केला. त्यानंतर त्यांना एक व्यक्ती प्रवाशांचे तिकीट तपासताना व पैसे गोळा करताना आढळून आला. संशयितास अहमदनगरमध्ये एक बनावट तिकीट तपासणीच्या नावे प्रवाशांची फसवणुक करताना रंगेहाथ पकडण्यात आले.
संशयिताला तिकीट तपासणी कर्मचाऱ्याची ओळख स्थापित करण्यास सांगितले असता, संशयिताने आढेवेढे घेत असफलता दर्शवली. यानंतर, आरोपीस पॅन्ट्री कारमध्ये नेण्यात आले. वाणिज्य नियंत्रण पुणे यांना संशयितास पकडल्याची माहिती देण्यात आली. बनावट तिकीट तपासणी कर्मचाऱ्याला पुढील आवश्यक कारवाईसाठी दौंड कर्मचाऱ्यांच्या स्वाधीन करण्यात आले आहे. त्याच्यावर पोलीस स्टेशनला कायदेशीर कारवाई करण्याचे काम सुरु होते.