चाळीसगाव तालुक्यातील पाटणादेवी येथे नवरात्रोत्सवाची तयारी
चाळीसगाव (प्रतिनिधी) – येथील पाटणादेवी मंदिराजवळ तितूर नदीच्या पुलाच्या कामाला सुरुवात झाली आहे. अनेक दिवसांपासून प्रलंबित असलेले हे काम अखेर आ. मंगेश चव्हाण यांच्या पुढाकाराने सुरु करण्यात आले असून भाविकांमध्ये समाधानाचे वातावरण आहे.
गेल्या ३ वर्षांपासून पुरातत्व विभागाच्या कायद्याच्या कचाट्यात अडकलेल्या आदिशक्ती चंडीकादेवी (पाटणादेवी ता.चाळीसगाव) मंदिराजवळील तितूर नदीवरील पुलाच्या कामाला या नवरात्र उत्सवात देखील मुहूर्त मिळाला नाही. आमदार मंगेश चव्हाण यांनी आपल्या आमदार निधीतून दोन वेळा २५ लाख रुपयांच्या निधीचे पत्र देऊनही नवीन पुलाच्या बांधकामासाठी केंद्र सरकारच्या अखत्यारीतील पुरातत्व विभागाने परवानगी दिली नाही. पाटणा ग्रामस्थांनी सदर पुलासाठी जलसमाधी आंदोलन देखील पुकारले होते. अतिशय धोकेदायक व पाण्याचा प्रचंड प्रवाह असणाऱ्या या नदीतून जीव मुठीत धरत यावर्षीदेखील लाखो भाविक भक्तांना मार्ग काढावा लागतो की काय अशी परिस्थिती निर्माण झालेली होती.
आमदार मंगेश चव्हाण यांनी कामासाठी पुढाकार घेऊन भाविकांच्या सोयीसाठी तितूर नदीवर तात्पुरत्या स्वरुपात पुलाच्या उभारणीचे काम आज दि.१२ ऑक्टोंबर पासून सुरु केले. आ. चव्हाण यांनी स्वतः कामाच्या ठिकाणी जाऊन पाहणी केली व पुलाच्या उभारणी संदर्भात सूचना दिल्या. शारदीय नवरात्र उत्सवाला दर्शनासाठी येणाऱ्या लाखो भाविकांची मोठी सोय यानिमित्ताने होणार आहे. सदर पाहणी प्रसंगी वन्यजीव विभागाचे अधिकारी देसाई, जाधव, पाटणा सरपंच नितीन पाटील, माजी नगरसेवक भास्कर पाटील, युवा मोर्चा प्रदेश उपाध्यक्ष भावेश कोठावदे, मनोज गोसावी आदी उपस्थित होते.
आमदार मंगेश चव्हाण यांनी यावर्षीचा नवरात्र उत्सव अविस्मरणीय करण्याचा संकल्प केला आहे. पाटणादेवी मंदिर व परिसर नऊ दिवस – नवदुर्गा संकल्पनेवर आधारित सजवला जाणार आहे, तसेच देवीला दागिन्यांचा साज घालून मढवले जाणार असून भाविकांच्या वाटेत विद्युत रोषणाई देखील केली जाणार असल्याने एक वेगळीच अध्यात्मिक अनुभूती भाविकांना मिळणार आहे. लोकप्रतिनिधी म्हणूनच नव्हे तर देवीचा भक्त या नात्याने दर्शनासाठी येणाऱ्या भाविकांना अडचणी येऊ नयेत याची जबाबदारी माझी आहे, असे आ. मंगेश चव्हाण यांनी सांगितले.
