जळगाव शहरात दांपत्यासह तरुणीविरुद्ध गुन्हा दाखल
जळगाव ( प्रतिनिधी ) – अल्पवयीन मुलीशी मैत्री करून तिला काम मिळवून देण्याचे अमिष दाखवत तिला वेगवेगळ्या पुरुषांशी शरीरसंबंध ठेवण्यास लावल्याचा धक्कादायक प्रकार समोर आला आहे. यामध्ये १६ वर्षीय अल्पवयीन मुलगी गर्भवती राहिली. या प्रकरणी पती-पत्नीसह एका तरुणीविरुद्ध रामानंद नगर पोलिस ठाण्यात गुन्हा दाखल करण्यात आला आहे.
हा प्रकार जून ते ऑगस्ट २०२५ या दरम्यान कोल्हे नगर परिसरात सुरू होता. रामानंद नगर पोलिस ठाण्याच्या हद्दीतील एका १६ वर्षीय अल्पवयीन मुलीशी तुकाराम वाडीतील तरुणीने ओळख करून तिच्याशी मैत्री केली. त्यानंतर माझ्या मैत्रिणीकडे काम केल्यास तुला खूप पैसे मिळतील असे सांगून या मुलीची सतीश उर्फ मनोज सुभाष पाटील व सरला सतीश पाटील (दोन्ही रा. पौर्णिमा बंगला, कोल्हेनगर) या दोघांशी ओळख करून दिली. तरुणीने या मुलीला पांडे डेअरी चौकात बोलविले. त्यानंतर रात्री १० वाजता सतीश पाटील व सरला पाटील यांच्यासह एक अनोळखी पुरुष कारमध्ये आले व ते तिला घरी घेऊन गेले.
रात्रभर ती तेथेच राहिल्यानंतर सकाळी तिला पैशाचे अमिष दाखवत वेगवेगळ्या पुरुषांसोबत शरीरसंबंध ठेवण्यास सांगितले. प्रति व्यक्तीप्रमाणे या मुलीला ५०० रुपये देण्यात आले. हा प्रकार सतीश पाटील याच्या घरीच सुरू असायचा. यामध्ये अल्पवयीन मुलगी गर्भवती राहिली.
४ सप्टेंबर रोजी या मुलीचे तिच्या आईशी भांडण झाल्याने ती घरातून निघून गेली. सुरुवातील भुसावळ व तेथून कोल्हे नगरात पौर्णिमा बंगला येथे ती आली. तिच्या शोधात जिल्हा पेठ पोलिस पौर्णिमा बंगला येथे गेले व तिला पोलिस ठाण्यात आणले. तेथे तिने आईसोबत जाण्यास नकार दिला. त्यामुळे तिला बालसुधार गृह व नंतर शासकीय आशादीप वसतिगृहात दाखल करण्यात आले. तिची प्रकृती खराब झाल्याने तिला शासकीय वैद्यकीय महाविद्यालय व रुग्णालयात नेले असता तपासणीदरम्यान ती गर्भवती असल्याचे समोर आले.
या प्रकरणी मुलीने १३ सप्टेंबर रोजी रामानंद नगर पोलिस ठाण्यात फिर्याद दिली. त्यावरून सतीश पाटील, सरला पाटील व तुकाराम वाडीतील तरुणीविरुद्ध बलात्कार, पोक्सो तसेच पीटा कलम ३, ४, ५ प्रमाणे गुन्हा दाखल करण्यात आला आहे. पुढील तपास सपोनि संदीप पाटील करीत आहेत.
