जळगाव ( प्रतिनिधी ) – शहरातील छत्रपती शिवाजीनगर उड्डाणपुलाजवळ लग्न मोडण्याच्या कारणावरून तरुणावर चॉपर हल्ला करून गंभीर जखमी केल्याची घटना घडली होती. या संदर्भात सोमवार ३ एप्रिल रोजी रात्री ९ वाजता शहर पोलीस स्टेशनला एकावर गुन्हा दाखल करण्यात आला असून संशयित आरोपीला अटक करण्यात आली आहे.
शहर पोलीस स्टेशनला दिलेल्या फिर्यादीनुसार संशयित आरोपी विवेक किशोर मराठे ( रा. ब्राम्हण सभा, बळीराम पेठ, जळगाव ) याचा नातेवाईक गोलू मराठे याचे प्रेमसंबंध असलेल्या तरुणीशी लग्न जुळल्यानंतर ते विक्की सांडू यादव (वय-२७) याच्यामुळे मोडण्यात आले. याचा राग मनात ठेवून विवेक मराठे याने रविवारी २ एप्रिल रोजी रात्री १० वाजेच्या सुमारास छत्रपती शिवाजी नगर रेल्वे उड्डाणपुलाजवळ वाद घातला. हा वाद विकोपाला गेल्यानंतर रागाच्या भरात विवेक मराठे याने विक्कीच्या पोटात चॉपर खुपसला. यात विक्की हा गंभीर जखमी झाला आहे. त्याला जिल्हा शासकीय वैद्यकीय महाविद्यालयात उपचारार्थ दाखल करण्यात आले आहे. यासंदर्भात सोमवारी ३ एप्रिल रोजी रात्री ९ वाजता दिपक गवळी यांनी दिलेल्या फिर्यादीवरून संशयित आरोपी विवेक किशोर मराठे याच्या विरोधात शहर पोलीस स्टेशनला गुन्हा दाखल करण्यात आला आहे. घटना घडल्यानंतर शहर पोलीसांनी विवेक मराठे याला अटक केली होती. या घटनेचा पुढील तपास पोलीस उपनिरीक्षक सर्जेराव क्षिरसागर करीत आहे.
