जळगाव (प्रतिनिधी):- शहराच्या मध्यवस्तीत असलेल्या जिल्हा परिषद कार्यालयासमोरून दुचाकीने जाणाऱ्या एका १७ वर्षीय तरुणाला चौघांनी अडवून त्याचा मोबाईल जबरदस्तीने हिसकावून नेल्याची घटना घडली. याप्रकरणी जळगाव शहर पोलीस स्थानकात गुन्हा दाखल करण्यात आला आहे.
नेमकी घटना काय? मुस्तकीम शेख सईद (वय १७, रा. उस्मानिया पार्क) हा तरुण १४ एप्रिल रोजी रात्री १०:३० च्या सुमारास आपल्या काकांना भेटून दुचाकीने (क्र. MH 19 CC 9268) घराकडे जात होता. जिल्हा परिषदेसमोरील पत्री हनुमान मंदिराजवळ दबा धरून बसलेल्या चार अज्ञात इसमांनी त्याला इशारा करून थांबवले. त्यांनी मुस्तकीम कडे पैशांची मागणी केली. पैसे नसल्याचे सांगितल्यावर एकाने त्याची अंगझडती घेतली, मात्र पैसे मिळून आले नाहीत. यावेळी दुसऱ्या एकाने त्याला मारण्यासाठी दगड उचलला, परंतु एका साथीदाराने त्याला रोखले. त्यानंतर आरोपींनी मुस्तकीमच्या शर्टच्या खिशातील ६००० रुपये किमतीचा विवो (Y31) कंपनीचा मोबाईल बळजबरीने हिसकावून घेतला आणि अंधाराचा फायदा घेत पळ काढला. या प्रकरणी पोलीस हवालदार दीपक शिरसाठ पुढील तपास करत आहेत.
