जळगाव शनिपेठ पोलिसांनी दोघांना केली अटक ; कोठडीत रवानगी
जळगाव (प्रतिनिधी) : एका रिक्षाचालकावर कारवाई करीत त्याच्याकडून जिवंत काडतूस आणि पिस्टल शनिपेठ पोलीस स्टेशनच्या कर्मचाऱ्यांनी जप्त केली होती. दरम्यान, सखोल तपासामध्ये सदरची बाब ही जुन्या वादातून आणखी दोघं तरुणांनी घडवून आणल्याचे उघडकीस आले आहे. याबाबत दोघांना अटक करण्यात आली असून त्यांना पाच दिवसांची पोलीस कोठडी सुनावण्यात आली आहे.
शहरातील नेरी नाका परिसरात दि. २८ मार्च रोजी दुपारी १२ वाजता सुमारास शनिपेठ पोलीस स्टेशनच्या कर्मचाऱ्यांनी रिक्षा चालक राहुल रंगराव पाटील (रा. कुसुंबा) याच्याविरुद्ध कारवाई केली होती. त्याच्या रिक्षातून देशी कट्टा आणि दोन जिवंत काडतूस आढळून आले होते.(केसीएन)त्यावरून त्याच्याविरुद्ध शस्त्र अधिनियम नुसार गुन्हा दाखल करण्यात आला होता. दरम्यान पोलिसांनी सखोल तपास करून यातील सत्य बाहेर काढले आहे. रिक्षा चालक राहुल पाटील यांच्यासोबत कुसुंबा येथील नितीन वसंत तायडे (वय २५) याच्यासोबत वारंवार वाद होत होते. त्यामुळे राहुल पाटील याला खोट्या गुन्ह्यात अडकवण्यासाठी नितीन तायडे यानी कट रचला.
नितीन तायडे याने दुसरा संशयित आरोपी ऋषिकेश उर्फ बंटी बापू चित्ते (वय २०, रा.कुसुंबा) याच्या मदतीने गुन्ह्यात जप्त केलेले पिस्टल आणि दोन जिवंत काडतूस हे दि. २८ मार्च रोजी रात्री दोन वाजेच्या सुमारास राहुल पाटील यांच्या रिक्षात ड्रायव्हर सीटच्या खाली स्टेपनी बॉक्समध्ये लपवून ठेवले. यानंतर ऋषिकेश याने एका हॉटेलचालकापर्यंत ही माहिती पोहोच केली. हॉटेल चालकाचा मित्र पोलीस असल्याने त्याने सदरची माहिती दिल्यानंतर रिक्षाचालकावर कारवाई झाल्याचे तपासात दिसून आले आहे
शनिपेठ पोलीस कर्मचाऱ्यांनी संशयित आरोपी नितीन वसंत तायडे व ऋषिकेश उर्फ बंटी चित्ते यांना ताब्यात घेऊन अटक केली आहे. दोघांविरुद्ध रिक्षा चालक राहुल पाटील याला शस्त्र अधिनियम अंतर्गत कारवाई व्हावी म्हणून त्याचे विरुद्ध खोटा पुरावा उभा केल्याचे कलम लावण्यात आले आहे.(केसीएन)संशयित नितीन तायडे व बंटी चित्ते यांना ५ दिवसांची पोलीस कोठडी सुनावण्यात आली आहे. तर रिक्षा चालक राहुल पाटील याला न्यायालयाने जामीन दिला आहे. सदरची कारवाई ही शनिपेठ पोलीस स्टेशनचे निरीक्षक रंगनाथ धारबळे यांच्या नेतृत्वाखाली सपोनि साजिद मंसूरी, उपनिरीक्षक योगेश ढिकले, नाईक किरण वानखेडे, विकी इंगळे, रवींद्र साबळे यांनी केली आहे.
