जळगाव शहरात नवनाथ नगर येथील घटना
जळगाव ( प्रतिनिधी ) – नाशिक येथे मेडिकल रिप्रेझेंटेटिव्ह म्हणून कार्यरत असलेल्या एका २७ वर्षीय तरुणाने जळगाव येथील आपल्या काकांकडे गळफास घेऊन आत्महत्या केल्याची घटना समोर आली आहे. कौस्तुभ सतीश पोतदार (रा. नवनाथ नगर) असे या तरुणाचे नाव असून त्याच्या आत्महत्येचे कारण अद्याप गुलदस्त्यात आहे.
कौस्तुभ काही दिवसांपूर्वीच जळगाव येथील नवनाथ नगरात राहणाऱ्या आपल्या काकांकडे आला होता. ७ फेब्रुवारी रोजी काका आणि कुटुंबातील इतर सदस्य काही कामासाठी घराबाहेर गेले असताना, कौस्तुभने घरात एकटे असल्याचा फायदा घेत गळफास लावून घेतला. कुटुंबीय घरी परतल्यानंतर ही धक्कादायक बाब उघडकीस आली. घटनेनंतर त्याला तातडीने शासकीय वैद्यकीय महाविद्यालय व रुग्णालयात नेण्यात आले, परंतु तपासणीअंती डॉक्टरांनी त्याला मृत घोषित केले.
कौस्तुभच्या आईचे यापूर्वीच निधन झाले असून त्याचे वडील पिंप्राळा परिसरात राहतात. त्याने इतक्या कमी वयात हे टोकाचे पाऊल का उचलले, याचा तपास जळगाव तालुका पोलीस स्टेशनचे हेडकॉन्स्टेबल गुलाब माळी करत आहेत.
