बदनामी व जीवे मारण्याची धमकी देत मानसिक छळ; जळगाव तालुका पोलिसांत गुन्हा दाखल
जळगाव (प्रतिनिधी) :- सोशल मीडियाचा गैरवापर करत एका 19 वर्षीय तरुणीला ब्लॅकमेल करून तिच्याकडून तब्बल एक लाख रुपयांची खंडणी उकळल्याचा धक्कादायक प्रकार जळगाव तालुक्यात उघडकीस आला आहे. याप्रकरणी जळगाव तालुका पोलीस ठाण्यात संशयित आरोपीविरुद्ध विविध गंभीर कलमांखाली गुन्हा दाखल करण्यात आला आहे.
पोलिसांनी दिलेल्या माहितीनुसार, जळगाव तालुक्यातील एका गावात राहणारी पीडित तरुणी कॉलेज शिक्षणासाठी जळगाव शहरात ये-जा करत होती. याचदरम्यान संशयित निलेश हिरामण मराठे (रा. आसोदा, जि. जळगाव) याने तिच्याशी ओळख वाढवली. मागील सुमारे एक वर्षापासून आरोपीने सोशल मीडियाच्या माध्यमातून तरुणीचे फोटो मिळवले तसेच तिच्यासोबत झालेल्या संभाषणाचे कॉल रेकॉर्डिंगही केले.
यानंतर आरोपीने तरुणीला धमकावण्यास सुरुवात केली. तिचे फोटो आणि ऑडिओ रेकॉर्डिंग आई-वडिलांसह इतर नातेवाईकांना व सोशल मीडियावर व्हायरल करून बदनामी करण्याची धमकी त्याने दिली. एवढेच नव्हे तर तरुणी व तिच्या कुटुंबीयांना जीवे मारण्याची धमकी देत तिच्याकडे शरीरसुखाची मागणीही करण्यात आली.
बदनामीच्या भीतीमुळे आणि मानसिक दबावाखाली पीडित तरुणीने आरोपीला वेळोवेळी रोख स्वरूपात एक लाख रुपयांपेक्षा अधिक रक्कम दिली. मात्र, आरोपीची मागणी वाढतच गेली. त्याने पुन्हा संपर्क साधून आणखी 25 हजार रुपयांची मागणी करत तरुणीचा मानसिक छळ सुरूच ठेवला.
अखेर या सततच्या त्रासाला कंटाळून पीडित तरुणीने धाडस दाखवत जळगाव तालुका पोलीस ठाण्यात तक्रार दाखल केली. पोलिसांनी संशयित आरोपीविरुद्ध गुन्हा नोंदवला असून पुढील तपास सहाय्यक पोलीस निरीक्षक सुनील पाटील करीत आहेत.
