कारागृहाच्या तपासणीत आढळला प्रकार
जळगाव (प्रतिनिधी) – येथील जिल्हा कारागृहात बंदी असलेला कैदी हा शासकीय वैद्यकीय महाविद्यालय व रुग्णालयात (सिव्हिल हॉस्पिटल) येथे उपचारासाठी दाखल झालेला होता. उपचार झाल्यावर कारागृहात परत जात असताना त्याच्या तपासणीत चप्पलमध्ये गांजा ठेवलेला आढळून आला आहे. हवालदाराने दिलेल्या तक्रारीवरून त्याच्याविरुद्ध जिल्हापेठ पोलिस ठाण्यात गुन्हा दाखल करण्यात आला आहे.
विठ्ठल उर्फ माऊली तुकाराम हटकर असे या कैद्याचे नाव आहे. जळगावातील संभाजीनगर भागातील विठ्ठल हटकर हा न्यायालयीन बंदी म्हणून जिल्हा कारागृहात आहे. त्याला प्रकृती अस्वास्थामुळे कारागृहातून शासकीय वैद्यकीय महाविद्यालय व रुग्णालयात कैदी कक्षात उपचारासाठी १६ ऑगस्ट रोजी दाखल करण्यात आले होते. उपचार पूर्ण झाल्यावर दोन दिवसांनी शुक्रवारी १८ ऑगस्ट रोजी त्याला रुग्णालयातून डिस्चार्ज मिळाला.
त्यानंतर त्याला जिल्हा रुग्णालयातून कारागृहात परत नेण्यात आले. त्यावेळी १८ ऑगस्ट रोजी त्याने परिधान केलेल्या चप्पलमध्ये आठ ग्रॅम गांजा आढळून आला. या प्रकरणी कारागृह हवालदार सुरेश बडगुजर यांनी जिल्हापेठ पोलिस ठाण्यात फिर्याद दिली आहे. त्यावरून विठ्ठल हटकरविरुद्ध गुन्हा दाखल करण्यात आला आहे. पुढील तपास सहायक पोलिस निरीक्षक मीरा देशमुख करीत आहेत. दरम्यान, या प्रकारामुळे खळबळ उडाली आहे. विठ्ठल हटकर याला गांजा कुठून व कसा मिळाला हा आता पोलीस तपासाचा भाग आहे.
