जळगाव ( प्रतिनिधी ) – जिल्ह्यातील ममुराबाद येथील 13 वर्षीय मुलाचा हिटरचा शॉक लागून जागीच मृत्यू झाल्याची घटना दुपारी घडली. जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
प्रणव मुकुंदा पाटील (वय-१३) असं मयत मुलाचे नाव आहे. मुकूंदा पाटील हे पत्नी व तीन मुलांसह ममुराबादेत वास्तव्याला आहेत . मुकूंदा पाटील यांचा भाऊ डिगंबर पाटील यांच्या मुलीचे लग्न असल्याने घरात लग्नाची तयारी सुरू होती. रविवारी मुकूंदा पाटील आणि त्यांची पत्नी दिपाली पाटील भावाच्या घरी गेले होते. त्यावेळी त्यांचा मुलगा प्रणव घरी एकटाच होता. दुपारी बाथरूममध्ये बादलीत हिटर लावले होते. बाजूलाच प्रणव अंघोळ करण्यासाठी बसला. अचानक विद्यूत हिटरचा शॉक लागल्याने प्रणवचा जागीच मृत्यू झाला. दरम्यान, लग्नात आलेले रवींद्र पाटील हे घरी आले असता हा प्रकार लक्षात आला. त्यांनी तातडीने नातेवाईकांना बोलावून घेतले. या घटनेमुळे लग्न घरात शोककळा पसरली असून नातेवाईकांनी एकच आक्रोश केला होता
मुलाचा मृत्यू झाल्याचे पाहून आई-वडिलांनी हंबरडा फोडला. मृतदेह शासकीय वैद्यकीय महाविद्यालयात नेण्यात आला. शवविच्छेदन करून मृतदेह नातेवाईकांच्या ताब्यात देण्यात आला आहे
